2024 оны 01 дүгээр сарын 13-нд “Эврика онлайн дэлгүүр” гэх хаягтай фэйсбүүк хуудас цастай өвлийн хүйтэнд бэлтгэлийн хувцастай гүйж буй эмэгтэйн бичлэгийг “Цог жавхлант Адъяасүрэн гишүүн маань сайхан давхиж байна шүү” гэсэн тайлбартайгаар нийтэлжээ.
Энэ бичлэг нь А.Адъяасүрэн гишүүний бичлэг биш харин Шинжаанд амьдардаг эмэгтэйн бичлэг аж. Бид бичлэгийн эх сурвалжийг хайхад Хятадын TikTok хувилбар буюу Douyin-д 2024 оны 01 дүгээр сарын 09-нд Токu (托库) гэх хаягт нийтлэгдэж байсан бичлэг юм. Харин бичлэгт явж буй дуу нь мөн Шинжааны “URAAL” гэх хамтлагийн “Хараадай” нэртэй дуу юм.
Эврика онлайн дэлгүүр хуудас Токu гэх хаягт нийтлэгдсэн бичлэгийн эхний 14 секундийг тасдан авч “А.Адъяасүрэн гишүүний гүйж буй бичлэг” хэмээн нийтэлсэн ба бүтэн бичлэгийг доорх хэсэгт үзэх боломжтой.
- Мөн Токu гэх хаягийн мэдээлэл IP хаягийн байршлыг Шинжаанд заасан байгааг харж болохоор байна. Тус хаягийг хөтөлдөг эмэгтэйн хоолны заавар оруулсан нэгэн бичлэгт баруун монгол аялгатай төстэй монгол хэлээр ярьж байгааг үзэж болно.
Гүйж буй эмэгтэйн бичлэгийг анх нийтэлсэн хаяг
Хэдийгээр бид бичлэг хийгдсэн газрын байршлыг тогтоогоогүй ч түүний хийсэн бусад бичлэгээс төстэй байршилд гүйж байсныг харж болно.
Бид Эврика онлайн дэлгүүр гэх хаягаас нийтэлж байсан хуурамч мэдээллийг 01 дүгээр сарын 12-нд шалгаж байсан бөгөөд энэ удаад А.Адъяасүрэн гишүүний бичлэг хэмээн өөр хүний хувийн бичлэгийг нийтлэн олон нийтэд түгээсэн байна.
Тус пэйжийг 2020 оны 04 дүгээр сарын 26-нд Sakib qe нэрээр үүсгэж байсан ба 4 удаа нэрээ сольжээ. Мөн Монголоос хоёр, АНУ-д байршилтай нэг админ пэйжийг удирддаг гэжээ.
Улстөрчийн талаар хуурамч мэдээлэл түгээхэд цаг үеийн нөхцөл байдлыг анзаарах нь чухал. УИХ-ын гишүүн А.Адъяасүрэн Хөрөнгө оруулалтын тухай хуулийг эсэргүүцэж, УИХ-ын даргыг Үндсэн хуулийн цэцэд өгсөн цаг хугацаатай давхацсан энэ мэт мэдээллийг олон нийтэд ташаа ойлголт өгөх зорилготойгоор түгээж байна.