2023 оны 11-р сарын 08-нд CoinHub Telegram Group гэх хуудаснаас “Хятадад хүүхэд хүчиндсэн этгээд цаазын ял авч байна” гэх тексттэй богино хэмжээний бичлэгийг түгээжээ. Тус бичлэг нь нийт 8,500 гаруй реакц, 306 сэтгэгдэл авч, 6,100 гаруй удаа цааш түгээгдсэн.
FACTCHECK: Бид дараах байдлаар баримт шалгалт хийлээ
Шалгаж буй бичлэгт шүүхийн тэнхимд хятад ханзаар бичсэн байсан учир бид Douyin (TikTok-ийн хятад хувилбар)-аас “Шүүхийн дэргэдэх хорих өрөө” гэх агуулгаар хайхад бидний шалгаж буй бичлэгтэй ижил газар хийсэн бичлэгийг @黄山市歙县人民法院 (Хуаншань хотын Шэшиан Ардын шүүх) гэх хаягт оруулжээ.
Үргэлжлүүлэн тус хаягийг шалгахад шалгаж буй бичлэгийн эх хувилбарыг 2023 оны 10-р сарын 17-нд “18-28 нас хүртлээ хулгайн хэргээр олон удаа хоригдож байжээ. Өнөөдөр түүнийг хулгайн хэргээр арав дахь удаагаа Шэ дүүргийн ардын шүүх шүүж байна… ” гэх тайлбартайгаар нийтэлсэн байна.
Тус хаяг нь Шэшиан мужийн иргэний шүүхийн албан ёсны Douyin хаяг гэх шошготой бөгөөд нийт 233,000 дагагчтай 1,8 сая хандалттай (like) хаяг аж.
Хятадын эрүүгийн хуульд хүчирхийлэл, хүчингийн хэрэг үйлдсэн тохиолдолд хэргийн хэмжээнээс хамаарч 3-10 жилээр хорих, 10 жилээс дээш хугацаагаар хорих, бүх насаар нь хорих, цаазаар авах ялаар шийтгэнэ хэмээн заасан байдаг.
