2024 оны гуравдугаар сарын 30-ны өдөр Матрикс Матрикс хуудсаас “10 сек-д 228 үсэрч, дэлхийн рекорд тогтоов гэнэ. Итгэмээргүй…..” гэх тайлбартай бичлэг оруулжээ. Тус бичлэг нь нийт 5,900 гаруй реакц, 318 сэтгэгдэл авч 444 мянга гаруй хэрэглэгч үзжээ.
FACTCHECK: Бид дараах байдлаар баримт шалгалт хийлээ
Шалгаж буй бичлэгийн хэсгийг “Google lens” хайлтын системээр хайхад илэрсэн Ecns.cn сайтын мэдээлэлд “Cen Xiaolin 30 секундийн дотор 228 үсрэлт хийж гиннесийн дээд амжилтын шинэчлэн тогтоолоо…” гэсэн тайлбартай илэрц гарч ирлээ. Үргэлжлүүлэн уг агуулгаар хайхад шалгаж буй бичлэгийн эх хувилбарыг “New China TV” youtube хуудаст 2019 оны 11 дүгээр сарын 19-нд “30 секундын дотор 228 үсрэлт! Шанхайд болсон дээсээр үсрэлтийн олон улсын тэмцээнд Хятадын өсвөр насны тамирчин дээд амжилтаа эвджээ” гэх тайлбартайгаар нийтэлжээ.
Cen Xiaolin 2019 оны 11 дүгээр сарын 16-нд болсон “Шанхайн сонирхогчдын наадам 2019”-д 30 секундэд 228 удаа хөлөө солбин үсэрч гиннесийн дээд амжилтыг тогтоосон.
Шалгаж буй бичлэгт хүүгийн хөл гацаж, бичлэгийн төгсгөл хэсэгт дүрс үсэрч буй мэт харагдаж байгаа нь бичлэгийг хэт хурдасгасныг илтгэж байна. Уг бичлэгийг эх хувилбарт хүү 30 секундэд 228 удаа үсэрсэн юм.
