2024 оны 2 дугаар сарын 20-ны өдөр Жамъян Долгорсүрэн гэх нэртэй фейсбүүк хэрэглэгч дараах хүнсний бүтээгдэхүүнүүдийн орцонд бөөс орсон байна гэх агуулга бүхий мэдээллийг оруулсан нь 2024 оны 2 дугаар сарын 29-ний байдлаар 84 реакц, 12 сэтгэгдэл авч, 224 удаа түгээгджээ.
E120 гэж юу вэ?
E120 буюу кармин нь кошениль хэмээх шимэгч хорхойноос гаргаж авдаг будагч бодис юм. Үүнийг АНУ-ын Хүнс, эмийн албанаас хоол, хүнсийг будах зорилгоор ашиглахыг зөвшөөсөн бөгөөд бараа бүтээгдэхүүний орцонд заавал бичиж дурдахыг шаарддаг байна.
Энэхүү бичлэгт карминыг хэрхэн гаргаж авч байгаа талаар харуулахаас гадна аливаа бараа, бүтээгдэхүүний орцонд “carmine”, “carmine acid”, “cochineal extract” зэрэг бичээстэй бол кармин агуулсан байна гэдгийг тайлбарлажээ.
E904 буюу “shellac” гэж юу вэ?
“Shellac” нь керриа лакка хэмээх Энэтхэг болон Тайланд улсад түлхүү байдаг модны шавжаас гаргаж авдаг байгалийн гаралтай давирхай юм. Энгийнээр харьцуулж хэлбэл зөгийнөөс зөгийн бал гаргаж авдагтай адилтгаж хэлж болно. “Shellac”-ийг чихэр, шоколад, бохь зэрэг хүнсний бүтээгдэхүүнүүдийг бүрэх зорилготой ашигладаг. Их Британийн Хүнсний стандартын ангетлагаас гаргасан хүнс будах, бүрэх зорилгоор ашиглагдаж болох жагсаалтад E120, E904 аль аль нь хүний биед аюул учруулахгүй хэмээн багтсан байна.
Дүгнээд харвал кармин, “Shellac” зэргийг гаргаж авахад бөөс ямар ч хамааралгүй аж. Иймд та аливаа хүнсний бүтээгдэхүүн авахдаа орцных нь мэдээллийг бусад баттай эх сурвалжтай тулгаж байна уу. Мөн эргэлзээтэй мэдээ, мэдээлэлд манай вэбсайт болон бусад улсын баримт шалгах вэбсайт руу орж, түлхүүр үгээр нь хайн худал, үнэн эсэхийг шалгаж байхыг зөвлөе.
