2023 оны 12 дугаар сарын 28 болон 29-нд Sansar Supermarket Chain нэртэй хуудсаар “Sansar supermarket chain -ийн төрсөн өдрийг тохиолдуулан 2023 оны 12-р сарын 31-нээс өмнө “Төрсөн өдрийн мэнд хүргэе” гэж бичсэн хүн бүр бэлгийн уут, бэлэн мөнгө эсвэл дэлгүүр хэсэх эрхийн бичиг хэлбэрээр онцгой шагналын эзэн болно. Амжилт хүсье” гэх постыг идэвхжүүлж 702 реакц, 3.5 мянган сэтгэгдэл, 6.1 мянган шэйр авсан байна.
FACTCHECK Бид дараах байдлаар баримт шалгалт хийлээ
Эх сурвалжыг шууд шалгах
Аливаа мэдээлэлд итгэж хариу үйлдэл үзүүлэхээсээ өмнө таны хамгийн түрүүнд хийх ёстой алхам бол эх сурвалжийг шалгах юм.
Ямар нэг брэндийн өмнөөс бэлэг тараана, урамшуулал олгоно гэсэн бол тухайн пэйж нь баталгаажсан тэмдэггүй л бол ихэнх тохиолдолд худал байна.
Мэдээлэл түгээсэн эх сурвалж нь пэйж байгаа тохиолдолд та Page Transparency цэс рүү орж хэн, хэзээ уг пэйжийг үүсгэж, хаанаас удирддаг зэрэг мэдээллийг харах боломжтой.
Бидний шалгаж буй пэйжийг анх 2023 оны 12 дугаар сарын сарын 29-нд буюу өчигдөрхөн үүсгэсэн гэж байна. Шинэ жил, тэмдэглэлт баярыг тохиолдуулан энэ төрлийн мэдээлийг идэвхжүүлэх зорилгоор шинэ пэйж үүсгэдэг нь худал мэдээлэл түгээгчдийн хамгийн нийтлэг ашигладаг арга юм.
Мөн та Sansar Supermarket Chain түлхүүр үгээр хайвал хамгийн эхэнд гарч ирэх илэрц буюу 143 мянган дагагчтай пэйжид зочилвол бидний шалгаж буй хуудас хуурамч болохыг анхааруулж мэдэгдэл гаргасан байна.
Хавсаргасан холбоосоос нь болгоомжил
Аливаа мэдээлэлд хавсаргасан холбоосыг сайтар нягтлах нь чухал. Үндсэн домайнаас нэг үсэг эсвэл тэмдэгт өөрчлөөд л яг ижилхэн нүүр хуудас гаргаад хэрэглэгчдийг луйвардах оролдлого хийх нь ч бий. Бидний шалгаж буй мэдээлэлд sites.google.com гэсэн өргөтгөлтэй байна. Энэ төрлийн домайн өргөтгөл нь дурын этгээд шууд нээж болох домайн юм.
Холбоос дээр дарж ороход сайтын хийц, бичвэрийнх нь найрлага, ашигласан үг, хэллэг зэргээр нь хуурамч сайтыг таньж болно. Мөн ашигласан зургуудыг Google Reverse image search хийж хайхад ашигласан зургуудаа Алтанжолоо группийн сайтаас шууд авсан байна.
Хэрвээ та “Энд дарж бүртгүүлнэ үү” гэсэн сонголт дээр дарах үедээ аль хэдийнээ Facebook хаягаа өөр цонхон дээр нээсэн бол энэ холбоосоор дамжуулан таны мэдээллийг шууд хуулбарлах, үгүй бол танаас хаягийн нэвтрэх мэдээллийг тань нэхэж болзошгүй. Мэдээллийн аюулгүй байдлын зөвлөхүүд таныг нэвтрэх нэр, нууц үг зэргээ үндсэн платформоос гадуурх бусад төхөөрөмж, платформууд дээр оруулахгүй байхыг зөвлөдөг.
