Монгол бүсгүй Бельги болон Канадын тоглолтыг шүүлээ гэх мэдээлэл егөөдөл

Шалгасан: MFCC
2022-11-25

Checked by: MFCC

Ерөнхий агуулга

Монгол эмэгтэй Бельги-Канадын хөлбөмбөгийн тоглолтыг шүүсэн гэх мэдээллийг түгээжээ.

Баримт шалгалтын үр дүн

FIFA-ийн шүүгчдийн жагсаалтад А.Хэрлэнчимэг гэсэн монгол эмэгтэй шүүгч байхгүй. Шалгаж буй мэдээлэлд хавсаргасан зураг нь Японы шүүгч Ёшими Ямашитагийн 2020 оны Токиогийн олимпын үеэр Бразил болон Замбиа улсын эмэгтэй багуудын хооронд болсон тоглолтыг шүүх үеэр авсан зураг байна.

2022 оны 11 дүгээр сарын 24-нд Нэр Төр.мн нэртэй Facebook хуудас “Монгол эмэгтэй Бельги-Канадын тоглолтыг шүүсэн” гэж мэдээлжээ. Тус пост нь “Бельги болон Канадын тоглолтын талбайн шүүгчээр Монголд төрж 1997 оноос АНУ-д амьдарсан Монгол бүсгүй Аюушийн Хэрлэнчимэг ажиллажээ. Түүний аав Цэвэлийн Аюуш нь Монголын хөлбөмбөгийн анхны шигшээ багийн гишүүн байсан ажгуу. Түүнд амжилт хүсээд сайхан шэйрлэчихеээ Монголчуудаа.” гэжээ.

1. Зургаар хайх аргаар мэдээллийн бодит байдлыг нягтлах

Постод ашигласан зургийг Google хайлтын системийн Google Lens функцаар хайж үзэхэд монгол эмэгтэйн бус Азийн аваргуудын лигийн тэмцээнийг шүүсэн япон эмэгтэй Ёшими Ямашитагийн талаарх мэдээллийн илэрцүүд гарч ирсэн. Тус зураг нь Ёшими Ямашитагийн 2020 оны Токиогийн олимпын үеэр Бразил болон Замбиа улсын эмэгтэй багуудын хооронд болсон тоглолтыг шүүх үеэр авсан зураг гэдгийг илэрцүүд дэх хайлтын үеэр “Getty Images” зургийн сангаас тогтоосон.

2. FIFA-ийн шүүгчдийн жагсаалтад А.Хэрлэнчимэг гэсэн монгол эмэгтэй шүүгч байхгүй

Мөн энэ оны Хөлбөмбөгийн дэлхийн аваргын тэмцээнд ажиллахаар Олон улсын хөлбөмбөгийн холбооноос (FIFA) сонгогдсон шүүгчдийн жагсаалтад Аюушийн Хэрлэнчимэг гэсэн шүүгч байхгүй байна. Харин тус жагсаалт шүүгч Ёшими Ямашита байгаа бөгөөд энэ удаагийн дэлхийн аваргаар анх удаа 3 эмэгтэй шүүгчийг шүүгчдийн бүрэлдэхүүнд оролцуулж байгаа юм. Үүнд, Ёшими Ямашита, Францын Стефание Фраппарт, Рвандын Салима Мукансанга нарын хамт энэ оны дэлхийн аваргын тэмцээнийг шүүнэ гэж BBC мэдээлжээ. Катарт болж буй хөлбөмбөгийн дэлхийн аваргын F группын Бельги-Канадын 11 дүгээр сарын 23-нд болсон тоглолтыг Замбиагийн шүүгч Жанни Сиказвэ (Janny Sikazwe) шүүсэн байна.

Аливаа мэдээллийг хуваалцахаасаа өмнө #ЭхлээдБод #Think1st

Та бүхэн манай төвийн баримт нягталсан мэдээтэй холбоотой аливаа санал хүсэлт, залруулга хийлгэх болон бусад санал гомдлоо редакторын hello@mfcc.mn имэйл хаягаар ирүүлнэ үү.

ЭХ СУРВАЛЖ, ХОЛБООТОЙ НИЙТЛЭЛҮҮД

Хуваалцах

Бид Олон Улсын Баримт Шалгагчдын Сүлжээ (International Fact-Checking Network)-ний ёс зүйн кодын дагуу аливаа мэдээллийг баримтаар баталгаажуулан шалгадаг. Баримтаар шалгасан мэдээллээ #ҮНЭН, #ХУДАЛ, #ТӨӨРӨГДҮҮЛСЭН, #БҮРЭН БУС, #ЭВЛҮҮЛЭГ, #ЕГӨӨДӨЛ гэсэн зургаан төрлөөр ангилж, олон нийтэд үнэн бодит мэдээлэл түгээн ажиллаж байна.