“Эко хүүхдийн төлөө нэгдье” гэх хэвлэлийн бага хурал нь вакцин эсэргүүцэгчдийн байнга түгээдэг худал, батлагдаагүй мэдээллийг дахин давтаж, олон нийтийг төөрөгдүүлжээ.
“HPV Vaccine on Trial: Seeking Justice for a Generation Betrayed” номыг мэргэжилтнүүд шинжлэх ухааны үндэслэлгүй, баталгаагүй жишээнүүдийг эш татаж бодит үр дүнгийн судалгааг үл ойшоосон гэж шүүмжилдэг байна. Мөн хүний хөхөнцөр вирусийн вакцин нь үргүйдэлд хүргэж, нөхөн үржихүй, жирэмслэлтэд нөлөөлдөггүйг олон улсын судалгааны байгууллагуудаас тогтоож, аюулгүй байдлыг баталгаажуулсан. Үүнээс гадна АНУ-ын төрөлтийн түвшин буурсан үзэгдэл эдийн засаг, нийгмээс шалтгаалсан бөгөөд вакцинтай шууд хамааралгүй.
Билл Гэйтс вакцинаар дамжуулан дэлхийн хүн амыг бууруулах тухай яриагүй. Мөн Монгол Улсын дархлаажуулалтын товлол болон Япон улсын вакцинжуулалтын бодлогын талаарх ташаа ойлголт үүсгэх мэдээллийг түгээжээ.
Шведэд хүмүүс сайн дурын үндсэн дээр вакцин хийлгэсэн тухай мэдээлэлтэй чип гартаа суулгуулсныг вакцинд чип байгаа мэтээр ойлгуулжээ.
Вакцинууд эсийн цөмөөс гадуур ажилладаг тул цөмд хадгалагддаг ДНХ-г өөрчлөх боломжгүй. Мутац нь эсэд байнга тохиолддог боловч бараг аль нь ч эрүүл мэндэд нөлөөлдөггүй. Учир нь хүний эсүүд мутацыг маш хурдан засах нарийн техниктэй.
Полисорбат нь уусгагч, тогтворжуулагч хүнсний нэмэлт юм. Полисорбат хүний нөхөн үржихүйн эрхтэнд нөлөөлдөг гэх хангалттай нотолгоо байхгүй. Аливаа эм, эмийн бэлдмэл, витамины төрлийн бүтээгдэхүүнийг эмчийн зааврын дагуу зохих тунгаар хэрэглэх нь зүйтэй.
