2023 оны 09 дүгээр сарын 7, 16-ны өдөр Keanu Reeves нэртэй пэйжээс “Бид 54 жилийн ойгоо угтаж дуртай өнгөөрөө бичдэг хүн бүрт 4 шинэ Toyota Hilux,Club 2023 бэлэглэхээр шийдлээ. Жишээ нь “хар” гэж надад нууцаар бичнэ үү (мессенжер)” гэсэн тайлбартай, автомашины зурагтай пост, мөн “Одоогоор хэн ч 608-аас өөр дугаар олоогүй байна. Ялагч тодроогүй, Toyota hillux. Бидэнд 36 хожил үлдээд байна. Бид таны хариуг нууцаар хүлээж байна (pm)” гэсэн тайлбартай, 608 гэсэн тоонуудыг жагсаасан зураг оруулсан нь 156 удаа цааш түгээсэн байдалтай байна.
Хуурамч мэдээллийг таних арга
Хаягийг шалгах
Мэдээлэл оруулсан Keanu Reeves нэртэй пэйж нь 2023 оны 05 дугаар сарын 20-нд нээсэн, 112691301830496 ID-тай, байршил болон админаа нуусан байна. Шалгаж буй мэдээлэлтэй ижил зургаан пост оруулсан ба Toyota Hilux автомашин бэлэглэх шалтгаан, албан ёсны ямар нэг мэдээлэл оруулаагүй, пэйжээ хөтөлсөн бодит түүхгүй.
Оруулсан мэдээлэлдээ чатаар харилцах автомат цонх нээж өгсөн ба хандсан тохиолдолд “*Эрхэм ялагч!*
Та * Тоёота машин * уралдааны ялагч боллоо. Бид иргэний үнэмлэхийг шалгана. Үргэлжлүүлэхийн тулд “* * *Би зөвшөөрч байна * *” гэж хариулна уу.*” гэсэн хариу ирүүлж, азтан болохын тулд бөглөх маягтаар хувийн мэдээллийг нь авах нөхцөлтэй байна.
Агуулгаар нягтлах
Toyota Hilux брэндийн автомашиныг үйлдвэрлээд 50 жил болж байгааг албан ёсны сайтаас нь мэдэж болно. Гэхдээ уг ойг тохиолдуулан автомашин бэлэглэх тухай мэдээлэл байхгүй.
Мөн тухайн постын дор өөрийн дуртай өнгөөр бичихэд зах зээлийн үнэ нь 30-65 сая төгрөгийн ханштай байгаа автомашиныг бэлгэнд өгнө гэдэгт итгэх хүн ховор. Гэвч, хариу бичиж, чатаар харилцвал автомашинтай болж магадгүй гэж хандсан хүмүүсийн зарим нь хувийн мэдээллээ алдах эрсэлд орж байна. Түүнчлэн хуурамч мэдээлэлд хариу үйлдэл хийж, хандалтыг өсгөснөөр цаашид ч энэ төрлийн мэдээллийг нүүр хуудсаараа харах болж, илүү чухал мэдээлэл авах орон зайгаа алдаж байгааг ухамсарлаж, идэвхжүүлэхгүй байгаарай.
