Аварга загас далайд сэлж байсан яст мэлхийг хүмүүсээр авруулахын тулд завь руу ойртуулж буй гэх бичлэг өндөр хандалт аваад байна (энд, энд бас энд). Бичлэгт нэгэн аварга загас яст мэлхийг амандаа зуун завины арын хэсэгт тулж очиход бичлэг таслагдаж дараагийн хэсэгт яст мэлхий ганцаараа хөвж буй хэсэг гарч яст мэлхийг завин дээр гарган хүзүүг нь боосон утсыг тасдан аварч буйг харуулжээ. Тус бичлэгийг тайлбарлан “Нэгэн акул загас амандаа яст мэлхий зуун жижиг завийг дагаж гэнэ. Тэр яст мэлхийг завин дээр гаргахыг оролдоод байж. Хүмүүс акулын санааг ойлгожээ. Акулыг жинхэнэ алуурчин махчин гэж буруу ойлгож байжээ би” гэж тэмдэглэсэн байна.
Энэхүү бичлэгийг ялгаатай өөр хэрэглэгч нарын аккаунтаас өөрийн туршлага, бодлоо залруулж буй мэт нэгдүгээр биеэс нийтэлсэн байсан нь санаатайгаар хандалт авах зорилгоор хуурамч, зохиомол мэдээлэл нийтэлж байна гэж үзэх нэг үндэслэл болсон.
Бид дээрх бичлэгийн хэсгүүдийг Youtube-д хайхад хоёр тусдаа үйл явдлын бичлэгийг нийлүүлэн аварга загас яст мэлхийг аврахад тусалсан мэтээр харуулахаар эвлүүлсэн байсныг тогтоосон. Тодруулбал, Youtube-д “shark saving turtle” гэсэн түлхүүр үгээр хайхад бичлэгийн эхний хэсэг буюу аварга загас яст мэлхийг амандаа зуусан хэсгийн талаарх бичлэгүүд гарч ирэх ба хамгийн анх Kai Owen Fishing гэх хаягтай загасчлалын влоггерын хаягт 2020 оны 11 дүгээр сарын 29-нд нийтлэгдэж байжээ.
Влоггер Кай Бахамын арлуудын Абако арлын ойролцоо загасчилж явж байхдаа аварга загас яст мэлхийг агнах гэж оролдож буйтай таарсан байна. Түүний бичлэгт аварга загас яст мэлхийг тавьж явуулсны дараа завин дээр гаргаж буй хэсэг гардгийг харж болох ба аврагдсан яст мэлхийний хүзүүнд ямар нэг олс байхгүй байна.
Харин бидний шалгасан бичлэгийн хоёр дахь хэсэг буюу хүзүүгээр нь олс ороосон яст мэлхийн бичлэгийг мөн Youtube-д “turtle fishnet” гэсэн түлхүүр үгээр хайж олсон. Яст мэлхийг олсноос салгаж буй бичлэг 2016 оны 08 дугаар сарын 12-нд “Sea Turtle Biologist” гэх далайн яст мэлхий аврагчийн хаягт нийтлэгдсэн байна.
Дээрх бичлэгт далайн биологич, байгаль хамгаалагч Кристин Фиггенер (Christine Figgener) Коста Рикагийн ойролцоох далайд хүзүү нь олсонд ороогдсон яст мэлхийтэй тааралдан олсыг нь тасдаж, шарханд нь иод түрхсэн болохоо тайлбарласан байна.
Аварга загас яст мэлхий рүү дайрсан болон хүзүүг нь боосон яст мэлхийг аварсан өөр газар, өөр цаг хугацаанд болсон хоёр үйл явдлуудын бичлэгийг нийлүүлэн олсонд боогдсон яст мэлхийг аварга загас аврахад тусалсан мэтээр эвлүүлсэн байна. Өөрөөр хэлбэл эхний бичлэг нь Бахамын арлуудад 2020 онд болсон үйл явдал бол олсонд боогдсон яст мэлхийн хоёр дахь бичлэг нь 2016 онд Коста Рикад болсон үйл явдал аж.
