2023 оны 04 дүгээр сарын 05-ны 12:04 цагт Dr. Unuruu нэртэй пэйжид “Тус кофе нь силиконы агууламжтай байх магадлалтай гэж солонгосын телевизээр гарсан байна” гэх тайлбартай постыг Солонгосын JTBC агентлагийн мэдээний дүрсийг хавсарган оруулсан нь 752 реакц, 188 сэтгэгдэл авч, 879 удаа цааш хуваалцсан байна.
Нийтэлснээс 30 минутын дараа постыг засварлаж “Мэдээж удахгүй эцсийн дүгнэлт гарах биз. Тэр үед нь дахин мэдээлэл оруулна. Түр анхааруулах зорилгоор пост хийсэн болно” гэх тайлбарыг нэмжээ.
FACTCHECK: Бид дараах байдлаар баримт шалгалт хийлээ
1. БНСУ-ын хэвлэлүүд холбогдох үйл явдлыг мэдээлжээ
Шалгаж буй мэдээлэлд зургийг нь хавсаргасан JTBC агентлагийн 04 дүгээр сарын 05-ны мэдээгээр:
“East West Foods компанийн Maxim кофе нь Солонгосын “Үндэсний кофе” гэж нэрлэгддэг. Гэтэл уг кофены уутнаас силиконы бутархай байсан гэх шуугиан дэгдээд байна.
Шуугианаас үүдэн East West Foods компани худалдаанд нийлүүлсэн бүтээгдэхүүнүүдээ буцаан татаж эхэлжээ. Бүтээгдэхүүн татах мэдэгдлээ өчигдөр хийсэн байна. Компанийн мэдэгдсэнээр Чанвон болон Инчон дахь үйлдвэрүүдэд 3 сард үйлдвэрлэсэн Maxim Gold Mocha кофены 8 төрлийн савлагаатай бүтээгдэхүүнүүдэд силиконы бутархай орсон байх магадлалтай аж” гэсэн байна.
2. БНСУ-ын Хүнс, эмийн яамнаас мэдэгдэл гаргасан байна
БНСУ-ын Хүнс, эмийн яамнаас East West Foods компанийн үйлдвэрт 04 дүгээр сарын 3-4-ний хооронд шалгалт хийж, дараах мэдэгдлийг гаргажээ.
“8 төрлийн савлагаатай бүтээгдэхүүнээс зөрчил илэрлээ
Шалгалтын дүгнэлтээр East West Foods компанийн Maxim кофены үйлдвэрийн төхөөрөмжийн силикон жийргэвч хөндийрч унан, бутлагдаж бүтээгдэхүүний түүхий эдтэй холилдсон байна. Силиконы бутархайг анзааралгүй 273,276 килограмм кофе үйлдвэрлэж борлуулжээ.
Гэсэн хэдий ч силиконы бутархай нь хоол боловсруулах замд шингэхгүй, хүний биеэс аюулгүй гадагшилдаг бөгөөд биед хөнөөл бага. Таны худалдаж авсан бүтээгдэхүүн дараах жагсаалтад байгаа эсэхийг шалгаарай”
| Бүтээгдэхүүний жин, савлагаа | Дуусах хугацаа |
|---|---|
| 50 ширхэгтэй, 600 грамм | 2024.09.19 – 2024.9.21 |
| 150 ширхэгтэй, 2.04 килограмм | 2024.9.19.～2024.9.26. |
| 180 ширхэгтэй, 2.4 килограмм | 2024.9.22.～2024.9.23. |
| 210 ширхэгтэй, 2.52 килограмм | 2024.9.23. |
| 220 ширхэгтэй, 2.64 килограмм | 2024.9.19.～2024.9.20. |
| 240 ширхэгтэй, 2.88 килограмм | 2024.9.20.～2024.9.22. |
| 250 ширхэгтэй, 3 килограмм | 2024.9.22.～2024.9.23. |
| 50 ширхэгтэй, 600 грамм | 2024.9.22.～2024.9.26. |
| 150 ширхэгтэй, 2.04 килограмм | 2024.9.20.～2024.9.22. |
| 180 ширхэгтэй, 2.4 килограмм | 2024.9.22.～2024.9.26. |
| 210 ширхэгтэй, 2.52 килограмм | 2024.9.20. |
| 280 ширхэгтэй, 3.36 килограмм | 2024.9.22. |
