2023 оны 03 дугаар сарын 14-нд Хэрэгтэй санаанууд нэртэй пэйжид “Приус худалдан авч байгаа хүмүүс батарейг ингэж шалгаарай” гэх гарчигтай дамран бичлэг /reel/ оруулсан нь 03 дугаар сарын 27-ны байдлаар 4.8 мянган реакц, 146 сэтгэгдэл авч, 5.1 мянган удаа цааш хуваалцсан байна. Бичлэгт приус машины батарейг хэрхэн шалгах вэ гээд зааврыг оруулжээ.
FACTCHECK: Бид дараах байдлаар баримт шалгалт хийлээ
1. Бичлэгт дүрсэлсэн зааварчилгаа нь зөвхөн хэрэглээний батарейг шалгаж буй хэрэг
Бид Toyota Motor корпорацын Монгол дахь албан ёсны борлуулагч болох Тоёота Таван Богд төвийн Засвар үйлчилгээний төвтэй 03 дугаар сарын 27-нд утсаар холбогдож мэдээллийг тодруулсанд:
“Мэдээж машин болгон Auxiliary battery буюу хэрэглээний батарейтэй. Харин приус маркийн машинд High Voltage Battery буюу өндөр хүчдэлийн батарейг нэмэлтээр суурилуулж өгсөн байдаг. Хэрэглээний батарейг жолооч нар маань аккумлятор гэж ихэвчлэн ярьдаг бөгөөд энэхүү бичлэгт үзүүлсэн зааварчилгаа нь зөвхөн хэрэглээний 12 вольтын батарейн ажиллагааг л шалгаж буй хэрэг юм. Хэрэглээний батарей асахаас өмнө 11.7 вольт, ассан үед 14.1 вольт гэх мэтээр хэлбэлздэг.
Зураг: Toyota Motor корпорацын Хайбрид загварын машинуудын тайлбар гарын авлага
Харин өндөр хүчдэлийн батарейн ажиллагааг тусгай төхөөрөмж ашиглан, компьютер оношилгоогоор яг аль хэсгийн батарейн ажиллагаа доголдсоныг шалгах ёстой. Учир нь өндөр хүчдэлийн батарей нь олон блокоос тогтох ба блок тус бүр нь бичил зай хураагуураас бүрдэх тул тус бүрийн хэвийн ажиллагааг мэргэжлийн засварын төвд хандан оношлуулах нь зүйтэй” гэж хариуллаа.
Иймд тус бичлэгт дурдсан аргачлал нь хэрэглээний батарейг шалгаж буй арга мөн хэдий ч, приус машины өндөр хүчдэлийн батарейг шалгах аргачлал биш тул энэхүү мэдээлэл нь бүрэн бус байна.
