2026 оны 09 дүгээр сарын 03-нд Сурвалж.мн – Survalj.mn нэртэй хуудаснаас “Ерөнхий боловсролын сурагчдын хувцаслалтад жигд стандарт, ёс зүй баймаар байна” гэх тексттэй өндөр өсгийт өмссөн хоёр эмэгтэйн зураг (архивласан хувилбар) түгээснийг нийт 835 реакц, 252 сэтгэгдлээр идэвхжүүлж, 93 удаа цааш түгээжээ. Мөн ARSLAN.mn, Todmedee.mn, Gegeennews.mn зэрэг хуудаст ижил тайлбартай түгээжээ.
FACTCHECK: Бид дараах байдлаар баримтаар шалгалаа
2026 оны 09 дүгээр сарын 03-ны өдөр нийгмийн сүлжээний платформуудаар шалгасан зургийг ЕБС-ийн сурагчидтай холбож, нэмэлт тайлбаргүй түгээсэн нь эл зураг Монголд авсан мэт ойлголт өгч төөрөгдүүлжээ.
Шалгасан зургийг Google Lens хайлтын системээр хайхад 09 дүгээр сарын 03-нд Монгол хаягуудаас түлхүү түгээсэн бол цаг хугацааны хувьд хамгийн эхэнд буюу 09 дүгээр сарын 01-ээс эхлэн Оросын нийгмийн сүлжээний платформуудаар түгсэн байна. Тодруулбал, Рифмы и Панчи гэх Vkontakte (Оросын нийгмийн сүлжээний платформ) хаягаас 09 дүгээр сарын 01-нд “Москвагийн сургуулийн охид 9-р сарын 1-нд” гэх тайлбартай нийтэлжээ. Мөн Smartik, Пикабу, Threads болон Telegram платформуудад шалгасан зургийг орос хэл дээрх тайлбартай түгээсэн байна.
Үргэлжлүүлэн зургийн ард харагдах сургуулийн байгууламжийy хэсгийг Google Lens хайлтын системээр хайхад Москва хотын Коммунарке дүүрэгт 2020 онд ашиглалтад орсон 2070 дугаар сургуулийн тухай мэдээлэл (газрын зурагт) гарч ирлээ. 2070 дугаар сургуулийн бусад зургийг энд бас эндээс үзнэ үү. Доорх зурагт шалгасан зураг болон Коммунарке дүүргийн 2070 дугаар сургуулийн зургийг харьцуулан харууллаа.
Дүгнэлт
Москва хотын Коммунарке дүүргийн 2070 дугаар сургуулийн гаднаас дарсан зургийг Монголд мэтээр төөрөгдүүлжээ. Жил бүр хичээлийн шинэ жилийн үеэр сошиал орчинд хандалтаа ихэсгэх, цаашлаад иргэдийн анхаарлыг сарниулах зорилготой төөрөгдүүлсэн, хуурамч мэдээлэл, зураг, бичлэг түгээх үзэгдэл ихэсдэг. Иймд аливаа мэдээлэлд шүүлтүүртэй хандаж шууд итгэхээсээ өмнө нягталж хэвшээрэй.
