2026 оны 08 дугаар сарын 3-нд “Decoración de fiestas” нэртэй Фэйсбүүк хаягаас “CU-тэй хамт азаа сорь” гэсэн тайлбартай постыг (архивласан хувилбар) холбоосны хамт түгээжээ.
FACTCHECK:
Хаягийг шалгавал, 71 дагагчтай, профайл зураг нь CU Mongolia сүлжээ дэлгүүртэй огт хамаарал, холбоо байхгүй засал чимэглэлийн зураг байна. Үргэлжлүүлэн тухайн хуудасны ил тод байдлыг шалгахад Перу улсаас нэг админ удирддаг нь харагдаж байна. Мөн “Decoración de fiestas” гэх уг хаягийн нэрийг орчуулбал, “баяр ёслолын чимэглэл” гэсэн утгатай үг аж.
CU Mongolia сүлжээ дэлгүүрийн албан ёсны Facebook хуудас нь 405 мянга гаруй дагагчтай, хаяг, холбоо барих дугаар зэрэг шаардлагатай бүх мэдээллээ оруулсан байгаа нь доор зурагт харагдаж байна. Мөн албан ёсны хуудсыг үзвэл “3 ижил тэмдэг нээгээд шагнал аваарай” гэх агуулгатай пост байхгүй байна.
“ushop.today” гэх вэбсайтыг Urlvoid хэрэглүүр ашиглан шалгахад, шалгаж буй мэдээлэл түгээсэн өдөр буюу 08 дугаар сарын 03-нд үүсжээ. Мөн үр дүнгийн мэдээлэл ногоон байвал тухайн сайт аюулгүй, харин шар, улбар шар байвал сэрэмжтэй байх шаардлагатайг илтгэдэг. Доор харьцуулсан байдлаар харууллаа.
Тус вэбсайт руу ороход “3 ижил тэмдэг нээвэл супер шагналын эзэн болно. Бусад бүх оролцогчдод мөн урамшуулал бий” хэмээн хэрэглэгчийг урхидаж, Төрийн банк, Хаан банк, Голомт банк, ХХБ, Капитрон банк зэрэг хүмүүсийн өдөр тутамдаа өргөн хэрэглэдэг банкнуудын вэбсайтын дизайныг ижил түвшинд дуурайлган хийсэн нэвтрэх нэр, нууц үгээ оруулах хуудас руу үсэрч байна. Энэ нь хэрэглэгчийн санхүүгийн мэдээллийг хулгайлах зорилготой “фишинг” халдлага юм.
Дүгнээд хэлбэл, CU Mongolia сүлжээ дэлгүүрийн нэр, лого, вэбсайт дизайн зэргийг ашиглан хуурамч вэбсайт үүсгэж, түүгээрээ дамжуулан “3 ижил тэмдэг нээгээд шагнал аваарай” хэмээн иргэдийг хуурч, интернэт банкных нь нэвтрэх мэдээллийг авч, залилж байна. Хуурамч вэбсайтад нэвтрэх нэр, нууц үгээ оруулснаар та залилагчдад интернэт банкны нэвтрэх мэдээллээ зүгээр өгч байна гэсэн үг. Иймд та аливаа вэбсайтад нэвтрэх мэдээллээ оруулахдаа заавал вэбсайтын холбоосыг (домайн) тогтмол шалгаж байгаарай.
