2026 оны 06 дугаар сарын 24-ны өдөр Gingko Max – Эрүүл, сэргэлэн тархи нэртэй хуудаснаас “Gingko Max тархийг эрүүл, сэргэг байлгаж аюултай хүндрэлээс сэргийлнэ” гэсэн агуулга бүхий тархины нэмэлт бүтээгдэхүүн сурталчилсан пост түгээжээ. Тус пост 334 реакц, 93 сэтгэгдэл авч, 199 удаа цааш түгээгджээ.
FACTCHECK:
Хаяг шалгах
Тархины нэмэлт бүтээгдэхүүн сурталчлан борлуулж буй “Gingko Max – Эрүүл, сэргэлэн тархи” хуудас нь 2025 оны 11дүгээр сарын 26-нд “JEZ Mongolia – Үе мөчний эрүүл мэндийг арчлах” гэсэн нэртэй нээгдэж, 2026 оэы 01 дүгээр сарын 28-нд одоогийн “Gingko Max – Эрүүл, сэргэлэн тархи” нэртэй болжээ.
Мөн тухайн хуудасны ил тод байдлыг шалгахад Вьетнам улсаас хоёр админ удирддаг нь харагдаж байна.
Түүнчлэн сүүлийн үед гаднын улсаас удирдаж буй хуудаснаас чанар, аюулгүй байдал нь тодорхойгүй бүтээгдэхүүн борлуулахдаа ашигладаг нэг хуудас бүхий хуурамч сайт руу чиглүүлж байна.
Зургаар хайх
Тухайн хаягаас сурталчилж буй “Gingko Max” гэх бүтээгдэхүүний баталгаатай байдлыг шинжлэхийн тулд Google Lens хэрэглүүр ашиглан зургаар хайлаа. Шалгасан мэдээлэлд дурдсан бүтээгдэхүүн олон улсын онлайн худалдааны сайтуудаар борлуулагдаагүй байна. Харин тухайн нэмэлт бүтээгдэхүүний гол орц болох “гинкго билоба”-ны талаарх эрүүл мэндийн байгууллагаас гаргасан мэдэгдэл болон судалгаанууд илэрцээр гарч ирлээ.
Тодруулбал, бүтээгдэхүүний гол орц болох гинкго билоба /Ginkgo biloba/ ургамлын нөлөөг шинжлэх ухаанаар бүрэн батлаагүй байгаа аж. Учир нь тус ургамлын хандыг их хэмжээгээр хэрэглэх нь зүрхний хэм алдагдах, толгой эргэх, харшил өгөх, суулгах зэрэг гаж нөлөөтэй байдаг. Мөн АНУ-ын Хүнс, Эмийн Захиргаанаас гинкго билобатай нэмэлт бүтээгдэхүүнийг албан ёсоор батлаагүй байна . Өөрөөр хэлбэл, уг ургамлын нэмэлтээр ямар нэгэн өвчнийг эмчлэх, урьдчилан сэргийлэх, зориулалттай гэдэг нь бүрэн батлагдаагүй байгаа юм.
Эрүүл мэндийн Cleveland Clinic сайтад “3,000 гаруй оролцогчийг хамарсан том хэмжээний судалгаагаар гинко нь ахмад настнуудын ой тогтоолт муудах буюу зөнөгрөл өвчнөөс урьдчилан сэргийлэхэд плацебо буюу хуурамч эмнээс дээрдэх зүйлгүй болох нь тогтоогджээ. Архаг ой тогтоолтын эмгэгтэй болсон хүмүүсийн хувьд өдөр тутмын үйл ажиллагаанд нь бага зэргийн эерэг нөлөө үзүүлсэн гэж тэмдэглэгдсэн ч тархины үйл ажиллагаа муудах явцыг удаашруулж чадаагүй” хэмээн мэдээлжээ.
Түүнчлэн тархины эрүүл мэндийг дэмжинэ хэмээн сурталчилдаг нэмэлт бүтээгдэхүүнүүдэд агуулагддаг олон шим тэжээл нь тархины хэвийн үйл ажиллагаанд чухал үүрэгтэй болохыг судлаачид хүлээн зөвшөөрдөг. Гэвч эдгээр шим тэжээлийн тархины эрүүл мэндэд үзүүлэх үр нөлөөний талаарх хамгийн хүчтэй нотолгоо нь нэмэлт бүтээгдэхүүнээс бус, харин төрөл бүрийн хоол хүнсээр хангалттай хэмжээгээр авч хэрэглэсэн нөхцөлд хийгдсэн судалгаануудаас гарсан байдаг гэжээ.
Дүгнээд хэлбэл, гаднын улсаас админ удирддаг хуурамч хаягаар баталгаагүй бүтээгдэхүүн сурталчлан борлуулж байна. Сурталчилж буй нэмэлт бүтээгдэхүүний гол орц болох гинкго билоба хэмээх ургамлын нөлөөг шинжлэх ухаанаар бүрэн батлаагүй байгаа бөгөөд тус ургамлын хандыг их хэмжээгээр хэрэглэх нь зүрхний хэм алдагдах, толгой эргэх, харшил өгөх, суулгах зэрэг гаж нөлөөтэй байдаг.
