2026 оны 05 дугаар сарын 26-нд Zuv Khovd Mn нэртэй хуудаснаас “Энд өндөг үйлдвэрлээд байна уу, өндөг чинь бөөн хор юм байна шүү дээ” гэсэн тайлбартай бичлэг (архивласан хувилбар) нийтэлжээ. Тус постыг нийт 1,400 гаруй реакц, 137 сэтгэгдлээр идэвхжүүлж, 2,300 гаруй удаа цааш түгээсэн байна.
FACTCHECK:
Шалгасан бичлэгт тоглоомон өндөг үйлдвэрлэх явцыг харуулжээ
Шалгаж буй бичлэгийн нэг хэсгийг screenshot хийгээд google lens хайлтын системд хайлт хийхэд Олон улсын баримт шалгах сүлжээний гишүүн AFP агентлаг, Vera Files, Factly зэрэг (IFCN) баталгаажуулалттай баримт шалгах байгууллагууд 2023 онд уг бичлэгтэй төстэй бичлэгийг шалгаж худал болохыг мэдээлж байжээ.
Тодруулбал, Vera Files баримт шалгах төвийн “Бичлэгт Хятадад үйлдвэрлэсэн хуурамч өндгийг харуулаагүй байна” гэсэн гарчигтай баримт шалгалтад, бичлэгийн зарим дүрс нь зуун наст өндгийг хэрхэн хийдэг үйл явцыг харуулсан болохыг тайлбарлаж, харин бичлэгийн сүүлийн хэсэгт тоглоомон өндөгний үйлдвэрлэлийг харуулсан гэдгийг мэдээлсэн.
Шалгасан бичлэг дээрх тоглоомон өндөгний талаар Энэтхэгийн FACTLY баримт шалгах төв дэлгэрэнгүй тайлбарласан байна. Тодруулбал, Хятадын цахим худалдааны сайтад зарагдаж буй тоглоомон өндгүүдийн лого нь шалгасан бичлэгт гарч буй өндөг дээрх логотой ижил байгааг зургаар харуулжээ.
Мөн DELFI медиа сүлжээний delfi.lt мэдээллийн сайтад “Энэтхэгийн хүнсний аюулгүй байдал, стандартын газраас гаргасан тодруулгад өндөг үйлдвэрлэхэд ашиглах технологи эсвэл химийн бодис байхгүй гэдгийг баталжээ. Мөн тус газраас энгийн өндөг нь зах зээлд элбэг бөгөөд хямд үнээр олдоцтой байхад хуванцар өндөг үйлдвэрлэх нь эдийн засгийн хувьд ямар ч ашиггүй, боломжгүй процесс болохыг онцолсон” хэмээн мэдээлжээ.
Дүгнэлт
Дүгнээд хэлбэл, тоглоомон өндөг үйлдвэрлэж буйг харуулсан бичлэгийг “өндөг чинь бөөн хор юм байна шүү дээ” гэсэн төөрөгдүүлсэн тайлбартай түгээжээ.
