2026 оны 04 дүгээр сарын 25-нд Оюунбаатарын Нямдорж нэртэй хаягаас “…2025 оны 12 дугаар сард Амарбаясгалан Их хурлын дарга байхдаа Цөмийн түлшийг хадгалах тухай олон улсын конвенцод нэгдчихсэн. Энэ нь юу вэ гэхээр бид олон улсын өмнө олборлосон, өөрөө Монгол нутгаас олборлосон ураныг хаа нэгэн газар ашиглаад буцааж хог хаягдлыг нь яг тухайн газар нь булах, булшлах эрх зүйг өөртөө авчихсан. Мөнхийн одоо тийм ураны булшны газар болох нь байна шүү дээ” гэх агуулга бүхий бичлэг (архивласан хувилбар) нийтэлжээ. Тус бичлэгийг 1,300 гаруй реакц, 140 сэтгэгдлээр идэвхжүүлж, 716 удаа цааш түгээжээ.
FACTCHECK:
Бид эрх зүйн мэдээллийн нэгдсэн системээс 2025 онд Монгол Улсын байгуулсан олон улсын гэрээнүүдийг нягтлахад тус онд шалгасан мэдээлэлд дурдсан “Цөмийн түлшийг хадгалах тухай олон улсын конвенцод” нэгдсэн гэх агуулгатай гэрээ, баримт бичиг байхгүй байна.
Түүнчлэн “Цөмийн түлшийг хадгалах тухай олон улсын конвенц” гэх нэршилтэй олон улсын баримт бичиг байхгүй. Харин уг агуулгатай төстэй “Цөмийн түлшний аюулгүй байдлын менежмент болон цацраг идэвхт хаягдлын аюулгүй байдлын менежментийн нэгдсэн конвенц“ нь цөмийн түлш, радиоактив хог хаягдлын аюулгүй байдлын менежментийг зохицуулах зорилготой бөгөөд 1997 онд батлагдаж, 2001 онд хүчин төгөлдөр болжээ. Одоогийн байдлаар 93 улс оролцож байгаа бөгөөд Монгол Улс тус гэрээнд нэгдээгүй байна.
Дүгнэлт
Дүгнээд хэлбэл, “цөмийн түлшийг хадгалах тухай олон улсын конвенц” гэх албан ёсны нэршилтэй баримт бичиг байхгүй. 2025 онд Монгол Улс ийм агуулга бүхий олон улсын гэрээнд нэгдээгүй байна.
