2026 оны 03 дугаар сарын 25-нд Орос Украйны байдал шуурхай мэдээ группэд “Улаанбаатар хотын түгжрэлийг шийдэх асуудал хүртэл Оросын нөлөө, саадтай шууд холбогдож байгаа нь улам тодорхой болж байна…” гэх зурагтай пост оруулсан байна. Уг зураг нь Х.Нямбаатар нэртэй баталгаажсан тэмдэгтэй хаягаас “Энэ хувилбарыг судлаагүй биш судалсан. Орос ах нар зөвшөөрдөггүй юм” гэсэн тайлбартай төмөр замын дээгүүр гүүрэн зам тавьсан зургийн хамт постолсон мэтээр үзүүлжээ.
Уг постыг 35 реакц 41 сэтгэгдлээр идэвхжүүлж, 36 удаа цааш түүгээсэн ч ижил агуулгатай дээрх зургийг ашигласан мэдээлэл Х болон Метагийн платформуудад олноор түгээсэн байна.
FACTCHECK:
Хотын дарга Х.Нямбаатарын хаягаар оруулсан гэх зургийг засвар оруулсан эсэхийг хянах Mever хэрэглүүрээр шалгахад текст хэсэгт, мөн гүүрэн дээрх автомашинуудад засвар оруулсан байна.
Цаашлаад тус хэрэлүүрийн Noiseprint++ хэмээх хиймэл оюунд суурилсан шүүлтүүрээр шалгахад текст болон хаягт засвар оруулсан гэх үр дүн гарлаа. Уг шүүлтүүр нь өөрчлөгдсөн хэсгүүдийг улаанаар, жинхэнэ хэсгүүдийг цэнхэр өнгөөр илэрхийлдэг.
Дүгнэхэд, Туул хурдны замыг тойрсон мэдээлэлд нийслэлийнхэн болон эсэргүүцэж буй иргэдийн талууд аль алинаас нь хуурамч мэдээллээр төөрөгдүүлэх оролдлого хийж байгаагийн нэг илрэл болох хотын дарга Х.Нямбаатарыг Орос ах нар зөвшөөрдөггүй гэж постолсон мэтээр өөрчилсөн зураг түгээж байгаа үзэгдэл юм. Уг зургийг Mever хэрэглүүрээр шалгахад текст болон хаягийн хэсгийг өөрчилсөн гэсэн үр дүн гарлаа.
