2026 оны 02 дугаар сарын 28-нд Хоол хүргэлт гэх нэртэй Фэйсбүүк пэйж “Өнөөдөр л 40% хямдралтай. Үнэгүй хүргэлттэй” гэх постыг холбоос хавсарган түгээжээ.
FACTCHECK:
Тус пэйжийн ил тод байдлыг шалгахад 66 дагагчтай, холбоо барих мэдээлэл оруулаагүй, гаднын нэртэй байснаа 2026.02.01-нд нэрээ “Хоол хүргэлт” болгож өөрчилсөн, мөн Пицца Хат, KFC хоёрын зургийг хольж ашигласан зэрэг нь залилангийн шинжийг агуулж байна.
Агуулгыг шалгая
“Өнөөдөр л 40 хувийн хямдрал” зурагт постерт “MPITSTSA.com” гэх линкийг холбож түгээжээ. Линкийн нэршлийг шинжвэл “МПИЦЦА” гэх үгийг латин үсэг рүү хөрвүүлэн “MPITSTSA” болгон вэбсайт үүсгэжээ. Вэбсайтын хэн, хэзээ, хаана үүсгэснийг шалгадаг UrlVoid хэрэглүүрээр шалгахад тус вэбсайт гуравхан хоногийн өмнө буюу 2026 оны 02 дугаар сарын 25-нд үүсжээ. Аливаа пэйж, вэбсайт цөөн хоногийн өмнө үүссэн байгаа нь залилангийн том шинж тэмдэг юм.
Pizza Hut Mongolia-ийн сэрэмжлүүлэг
2026 оны 02 дугаар сарын 12-нд Pizza Hut Mongolia-ийн албан ёсны Фэйсбүүк пэйж иргэдийг хуурамч пэйжээс зарласан хуурамч санал, урамшууллаас болгоомжлохыг сэрэмжлүүлжээ. Цаашлаад, “Иргэдийг захиалга өгөхдөө www.pizzahut.mn, PizzaHutMongolia апп, 7555-5555 дугаарт холбогдох, эсвэл Ubeats хоол хүргэлтийн апп ашиглах зэрэг зөвхөн Пицца Хатын албан ёсны сувгуудаар үйлчлүүлээрэй” гэжээ.
Цагдаагийн Ерөнхий Газрын Урьдчилан сэргийлэх хэлтсийн сэрэмжлүүлэг
2026 оны 02 дугаар сарын 12-нд Цагдаагийн Ерөнхий Газрын Урьдчилан сэргийлэх хэлтсээс “Сүүлийн өдрүүдэд захиалгат хоол хүргэлтийн сайтыг хуурамчаар дуурайлган бусдыг залилах тохиолдол цагдаагийн байгууллагад бүртгэгдэж байна” хэмээн анхааруулж дараах зөвлөмжийг хүргэж байна.
- Зөвхөн албан ёсны вэбсайт, аппликейшнээр дамжуулан захиалга хийх
- Сошиал сүлжээгээр илгээгдсэн сэжигтэй линк, хямдралын зар сурталчилгаанд шууд бүү итгэх
- Урьдчилгаа төлбөр нэхсэн тохиолдолд дахин нягталж шалгах
- Хувийн мэдээлэл, банкны картын мэдээллээ баталгаагүй эх сурвалжид оруулахгүй байхыг цагдаагийн байгууллагаас анхааруулж байна.
Дүгнэлт
Цахим орчинд бусдын нэр, лого, зургийг ашиглан жинхэнэ мэт дүр эсгэж, залилах явдал олширсоор байна. Иймд та худалдан авалт хийхээсээ өмнө түгээж буй пэйжийн ил тод байдлыг шалгах, холбосон вэбсайтыг UrlVoid, Who.is зэрэг хэрэглүүрээр нягталж байхыг зөвлөе.
Цагдаагийн байгууллагаас энэ төрлийн залилах гэмт хэргийн тухай удаа дараа сэрэмжлүүлж, “Ямар ч аж ахуй нэгж, байгууллага таны банкны кодыг асуухгүй. Иймд иргэдийг хуурамч хаяг эсэхийг шалгаж, банкны хувийн мэдээллээ нууцлахыг анхааруулж байна” гэжээ.
Хэрэв та энэ төрлийн залиланд өртсөн бол цаг алдалгүй 102 болон 5126-5666 дугаараар Цагдаагийн байгууллагын Кибер гэмт хэрэгтэй тэмцэх хэлтэст хандаарай.
