2026 оны 01 дүгээр сарын 23-нд “Food Delivery”, “Delivery Food” гэх нэртэй пэйж “Өнөөдөр л 60% хямдрал, үнэгүй хүргэлт” агуулгатай постыг “mongoliakfc.com” гэх холбоос хавсарган түгээжээ.
FACTCHECK:
Хаягийг шалгая
“Food Delivery”, “Delivery Food” гэх хоёр пэйж нь 2025 оны 08 дугаар сарын 22-нд зэрэг үүсчээ. Цаашлаад “mongoliakfc.com” гэх хуурамч вэбсайт холбосон, бусдын зургийг профайл зурагтаа ашигласан, Вьетнамын утасны дугаартай зэрэг хуурамч пэйжид түгээмэл ажиглагддаг шинж чанаруудыг агуулжээ.
Агуулгыг шалгая
Постод хавсаргасан “mongoliakfc.com” вэбсайтыг Urlvoid хэрэглүүрээр шалгаж үзэхэд, 10 хоногийн өмнө буюу 2026 оны 01 дүгээр сарын 16-нд үүсэж, АНУ-д сервер нь байршиж байна.
ХХЗХ-оос постод хавсаргасан вэбсайтыг хязгаарлажээ
Харилцаа холбооны зохицуулах хорооноос “mongoliakfc.com” вэбсайтыг зөрчилтэй үйл ажиллагаа эрхэлж буй цахим хуудас хэмээн Монгол Улсаас хандах хандалтыг хязгаарлажээ.
KFC Mongolia-ийн анхааруулга
2026 оны 01 дүгээр сарын 24-нд KFC Mongolia-ийн албан ёсны Фэйсбүүк пэйж “KFC брэндийн захиалгын системийг дуурайлган хийсэн “mongoliakfc.com” гэх хуурамч вэбсайт хэрэглэгчдийн банк, төлбөрийн мэдээллийг хууль бусаар авах оролдлого хийж байна“. Иймд хэрэглэгчдийг зөвхөн албан ёсны вэбсайт болох www.kfcmongolia.com-оор орж захиалга өгч байхыг анхааруулжээ.
Дүгнээд хэлбэл, KFC Mongolia-ийн онлайн захиалгын вэбсайтыг дуурайлган хийсэн хуурамч вэбсайтаар дамжуулан, иргэдийн банк, төлбөрийн мэдээллийг авч, залилан үйлдэж байна.
Иймд та цахим орчинд худалдан авалт хийхдээ тухайн газрын албан ёсны Фэйсбүүк пэйж, вэбсайт мөн эсэхийг сайтар шалгаж байхыг зөвлөе.
Мөн “Өнөөдөр л 60% хямдрал” гэх агуулга нь иргэдийг яаруулсан, сэтгэл хөдлөлд суурилан хурдан үйлдэл гаргах замаар урхидаж байгаа нь цахим залилагчдын түгээмэл арга, залиудын нэг юм.
