2026 оны нэгдүгээр сарын 12-ны өдөр “Үнэн үгс” нэртэй бүлгэмд Bayarmaa Alex гэх хаягаас “Гринланд арлынхан төрийн далбаагаа түр хугацаагаар Оросын далбаагаар солилоо” гэсэн агуулгатай мэдээлэл түгээжээ. Тус пост 653 реакц, 98 сэтгэгдэл авч, 113 удаа цааш түгээгдсэн байна.
FACTCHECK: Бид дараах байдлаар баримт шалгалт хийлээ
Энэхүү мэдээллийг шалгахын тулд агуулгыг нягталж, холбогдох түлхүүр үгээр хайлт хийлээ. Хайлтын үр дүнд дээрх мэдээллийг анх Оросын Панорама гэх сайтад нийтэлсэн нь илэрсэн. Гэвч уг мэдээлэл нь хуурамч юм. Учир нь Панорама нь батлагдсан хэвлэл мэдээллийн хэрэгсэл бус шог маягаар мэдээлэл бэлтгэдэг сайт юм. Энэ тухайгаа “Сайт дээрх бүх бичвэрүүд нь хэтрүүлэг ихтэй пароди нийтлэл бөгөөд бодит мэдээ биш юм” гэж анхааруулсан байна.
Олон улсын баримт шалгах сүлжээний гишүүн “mythdetector” байгууллагаас “Panorama.pub сайт нь өөрийн вэбсайт дээрээ хошин, егөөдлийн агуулгатай мэдээлэл түгээдэг гэдгээ анхааруулсан ил тод тайлбартай. Гэвч уг платформын мэдээллийг суртал ухуулгын зоригоор ашиглаж, хуурамч мэдээлэл түгээх үзэгдэл бий” гэж мэдээлж байжээ. Үүнээс уг сайт баталгаагүй, бодит бус мэдээлэл түгээдэг гэдгийг харж болно. Мөн зарим тохиолдолд ийм төрлийн мэдээллийг бусад сувгаар түгээж, зориуд олон нийтийг төөрөгдүүлэх зорилгоор ашигладаг аж.
Түүнчлэн “Гринланд арал төрийн далбаагаа сольсон” гэх ямар ч албан ёсны мэдэгдэл илрээгүй бөгөөд олон улсын баталгаатай хэвлэл мэдээллийн хэрэгслүүдээр ч ийм мэдээлэл түгээгүй байна.
Дүгнээд хэлбэл, “Гринланд арлынхан төрийн далбаагаа түр хугацаагаар Оросын далбаагаар солилоо” гэх мэдээлэл нь шог маягаар мэдээлэл бэлтгэдэг сайтаас түгсэн хуурамч мэдээлэл байна.
