2025 оны 12 дугаар сарын 25-нд Гүнширийн Мөнгөнхуяг Mungunkhuyag Gunshir (архивласан хувилбар) хаягаас “100 000 төгрөгийн дэвсгэрт гарахад бэлэн болжээ” гэх тайлбартайгаар 100 мянган төгрөгийн мөнгөн дэвсгэртийн зураг нийтэлжээ. Тус постыг нийт 1,300 гаруй реакц, 397 сэтгэгдлээр идэвхжүүлж, 164 удаа цааш түгээсэн байна.
Мэдээлэлд зуун мянгатын дэвсгэртээр “гүйлгээ хийнэ” гэж оруулаагүй байхад хүлээж авч буй хүмүүс “төгрөгийн ханш уналаа” гэх өнцгөөс шүүмжлэлтэй хандаж, төөрөгдүүлсэн ойлголт авсан нь олон байна. Тиймээс бүрэн дүүрэн мэдээлэл өгөх үүднээс дараах агуулгыг бэлдлээ.
FACTCHECK: Бид дараах байдлаар баримт шалгалт хийлээ
Монгол Улсад үндэсний мөнгөн тэмдэгт төгрөгийг гүйлгээнд гаргасны 100 жилийн ойг тохиолдуулан Монголбанкнаас гүйлгээнд хүчин төгөлдөр бус дурсгалын 100,000 төгрөгийн дэвсгэрт гаргасан тухай мэдээлэл Монгол Улсын төв банкны албан ёсны сайтад 2025 оны 12 дугаар сарын 09-нд нийтлэгдсэн. Монголбанкны албан ёсны сайтын “Мөнгөн тэмдэгт” цэсээс дурсгалын цаасан, зоосон мөнгөн дэвсгэрт болон гүйлгээнд байгаа мөнгөн тэмдэгтийг харах боломжтой.
Гүйлгээнд байгаа цаасан мөнгөн тэмдэгтэд 1-20,000 төгрөг хүртэлх нийт 11 мөнгөн тэмдэгт байна. Хамгийн сүүлд 2006 онд 20,000 төгрөгийн мөнгөн тэмдэгтийг анх хэвлүүлж байжээ.
Дурсгалын цаасан мөнгөн тэмдэг цэсэд 100,000, 20,000, 10,000, 5,000 төгрөгийн бэлэг дурсгалын мөнгөн дэвсгэрт байна. Эдгээр мөнгөн дэвсгэртээс гурвыг нь гүйлгээнд ашиглаж болох юм. Үүнд:
- Дурсгалын 20,000 төгрөгийн дэвсгэрт дээр Их Монгол Улс байгуулагдсаны 800 жилийн ойд зориулсан “Great Mongol State 800 years” хэмээн бичигтэй.
- 10,000 төгрөгийн дэвсгэртэд Ардын хувьсгалын 100 жилийн ойд зориулсан лого, морьтон баатрыг байршуулсан.
- 5,000 төгрөгийн дэвсгэр дээр Монгол Улсад банкны тогтолцоо үүссэний 100 жилийн ойг тохиолдуулан 100 жилийн ойн лого, морьтон баатрын дүрс оруулсан ба 2024 онд цөөн тоогоор гүйлгээнд гаргасан.
Бэлэг дурсгалын зориулалттай 100,000 төгрөгийн мөнгөн дэвсгэртийг гүйлгээнд ашиглах боломжгүй юм. Харин шалгасан мэдээлэлд ямар нэг дэлгэрэнгүй тайлбаргүйгээр, “мөнгөн дэвсгэрт гарахад бэлэн боллоо” гэх агуулгатай түгээсэн нь гүйлгээнд ашиглах боломжтой шинэ мөнгөн дэвсгэрт гарсан мэт ойлголт өгч төөрөгдүүлж байна.
