2025 оны 12 дугаар сарын 24-нд “Mongolia 2026” нэртэй Facebook пэйж “Монголын бүх иргэдэд зориулсан сугалаа явагдаж байна! Хүн бүр хожих боломжтой!” гэсэн агуулгатай постыг нэгэн холбоосны хамт түгээжээ.
FACTCHECK:
Хаягийг шалгая
Пост түгээсэн пэйжийг шалгавал 2021 оны 09 дүгээр сарын 24-нд үүссэн, Вьетнамаас удирддаг, 77 дагагчтай, танилцуулга хэсэг нь хоосон, ямар нэг постгүй байлаа. Эдгээр нь хуурамч пэйжийн түгээмэл шинж тэмдэг юм.
Пэйжийн ил тод байдлаас Ads буюу төлбөртэй постуудыг орж харахад, энэ төрлийн 20 гаруй постыг төлбөртэйгөөр түгээж байна.
Домэйн, вэбсайт шалгадаг Who.is хэрэглүүрээр төлбөртэй түгээсэн постод холбосон
“mongol-cp.cc” гэх домэйнийг шалгахад, 2025 оны 12 дугаар сарын 23-нд үүссэн, Хонг Конгийн Nicenic International Group гэх компаниас худалдаж авсан нь харагдаж байна. Ердөө хоёрхон хоногийн өмнө тус вэбсайт бий болсон нь залилангийн шинж чанартай гэдгийн нэг нотолгоо юм.
Хаан банкны сэрэмжлүүлэг
2025 оны 12 дугаар сарын 22-нд Хаан банкны албан ёсны пэйж “Бэлэн мөнгө хожлоо гэсэн зараас болгоомжил” гарчигтай сэрэмжлүүлгийг нийтэлжээ. Цаашлаад сугалаа, хонжвороор урхидаж харилцагчдын хувийн мэдээллийг хууль бусаар авах оролдлого ихээр бүртгэгдэж байгааг дурдахын зэрэгцээ хувийн мэдээллээ өгөхгүй байх, нэвтрэх нэр, нууц үгээ хэнтэй ч бүү хуваалцах, сэжигтэй линк дээр дарж орохгүй байх зэргийг анхааруулжээ.
2025 оны 12 дугаар сарын 23-нд Цагдаагийн ерөнхий газрын Урьдчилан сэргийлэх хэлтэс Facebook пэйждээ энэхүү шинэ төрлийн луйврын талаар сэрэмжлүүлжээ. Тус сэрэмжлүүлэг нь “Хаан банк шинэ жилийн баярыг тохиолдуулан урамшуулал, бэлэг олгож байна гэх аргаар урхидаж, иргэдээс хувийн мэдээллийг нь аваад, банкны аппликэйшнээр мөнгийг нь залилж байна. Ямар ч арилжааны банк, санхүүгийн байгууллага утсаар, чатаар таны хувийн мэдээллийг хэзээ ч асуухгүй. Зөвхөн өөрийн биеэр үйлчилгээ авч байх үед л таны хувийн мэдээллийг асуудаг” хэмээн анхаарууллаа.
ЦЕГ-ын Урьдчилан Сэргийлэх хэлтсийн сэрэмжлүүлэг
Цахим орчинд арилжааны банк болон санхүүгийн байгууллагын нэр, лого, зургийг ашиглан, залилж иргэдээс хувийн мэдээллийг авах тохиолдол түгээмэл байдаг. Иймд та хувийн мэдээллээ өгөхөөс урьтаж тухайн хаяг болон вэбсайт нь албан ёсных эсэхийг шалгаж байгаарай. Facebook пэйжийн ил тод байдлыг нь шалгах, вэбсайтыг Who.is, Urlvoid хэрэглүүр ашиглан домэйн хаяг нь хэзээ, хаана үүссэн, хэн эзэмшдэг зэргийг нягталж байхыг зөвлөе.
