2025 оны 12 дугаар сарын 18-нд “Emir Hayes Shawn Caden” нэртэй Facebook пэйж “Насан дээрээ дараад хөрөнгө оруулалтын хөтөлбөрийн ашиг тусыг хүртээрэй” хэмээн Монгол Улсын Ерөнхийлөгч асан Х.Баттулгын зурагтай постыг холбоосны хамт түгээжээ. Тус постыг 138 реакц, 59 сэтгэгдлээр идэвхжүүлж, 45 удаа цааш түгээжээ.
Хаягийг шалгая
Мэдээлэл түгээсэн хуудас нь “Emir Hayes Shawn Caden” гэх гаднын нэртэй, профайл зураггүй, 155 дагагчтай, пэйжийн төрөл “Men’s clothing store” буюу эрэгтэйчүүдийн хувцасны дэлгүүр, танилцуулга хэсэг нь хоосон, ямар ч пост байхгүй зэрэг нь хуурамч пэйжийн түгээмэл шинжүүдийг агуулж байна.
Агуулгыг шалгая
“Насан дээрээ дараад хөрөнгө оруулалтын хөтөлбөрийн ашиг тусыг хүртээрэй” хэмээн Монгол Улсын Ерөнхийлөгч асан Х.Баттулгын зурагтай постыг холбоосны хамт түгээжээ. “zuderey.pro” гэх домэйнтэй холбоос дээр дарж ороход news.mn мэдээллийн сайтыг дуураймлаар хийсэн 2025 оны 12 дугаар сарын 16-ны хувилбар байлаа. Лого зураг дээр “Орон инвест” гэж байгаа боловч агуулгын текст нь “Орхон инвест” хэмээн зөрж байна. “Орон инвест” эсхүл “Орхон инвест” аль, аль нь Open Datalab Mongolia дээр бүртгэгдээгүй компани байв.
www.zuderey.pro гэх домэйнийг шалгахад нэг сарын өмнө буюу 2025 оны 11 дүгээр сарын 19-нд үүсгэсэн байгаа нь хуурамч вэбсайтын нэг түгээмэл шинж тэмдэг юм. Харин news.mn вэбсайтын домэйнийг 2007 онд авч байжээ.
Дараах байдлаар хөрөнгө оруулж, мөнгөө өсгөнө хэмээн сурталчилжээ. Цаашлаад элсэхийн тулд овог, нэр, и-мэйл, утасны дугаараа өгч бүртгүүлэхийг шаардсан форм байлаа.
Вэбсайтын хэрэглэгчдийн сэтгэгдэл хэсэгт “ашгаа хүртсэн”, “сайн платформ”, “бүртгэлээс хоцорчих вий” зэрэг тогтмол текстийг цаанаасаа оруулж өгсөн нь иргэдэд үнэн мэт ойлголтыг төрүүлж байна. Үүнээс гадна сэтгэгдэл бичээд “илгээх” товчлуурыг ажиллахгүй болгосон нь залилуулсан хүмүүс сэтгэгдэл бичихээс зайлсхийсэн хэрэг юм.
Дүгнэлт
Цөөн дагагчтай, ямар нэг пост, профайл зураггүй хуурамч пэйжээс хөрөнгө оруулж, мөнгөө өсгөхийн тулд нэгэн вэбсайт руу орж, бүртгүүлэхийг шаарджээ. Тус вэбсайт нь нэг сарын өмнө үүссэн, news.mn мэдээллийн вэбсайтыг дуурайлган хийсэн хуурамч байв. Цаашлаад хувийн мэдээллийг иргэдээс авч, мөнгө өсгөх боломж хэмээн сурталчлан санхүүгийн залилан үйлдэж байна.
Иймд та аливаа вэбсайтыг urlvoid.com, who.is хэрэглүүрээр хэзээ үүссэн, хэн эзэмшдэг, хаанаас сервер авдаг, холбоо барих мэдээлэл зэрэг мэдээллийг авах боломжтой.
