2025 оны 12 дугаар сарын 21-нд Скрийншот Мэдээ нэртэй Facebook пэйж “Ундрам сайд Дамдиннямыгаа арай залуу хүнээр солихоор шийджээ!” гэх агуулгатай постыг зургийн хамт түгээжээ. Тус постыг 560 реакц, 147 сэтгэгдлээр идэвхжүүлж, 97 удаа цааш түгээжээ.
FACTCHECK:
Түгээсэн зургийг эх зурагтай харьцуулахад сандал, аяга байхгүй болсноос гадна ханын хэв, загварт засвар орсон нь харагдаж байна
Бид түгээсэн зургийг эх зурагтай харьцуулж үзэхэд арын бор өнгийн сандал байхгүй болж, ханын хэв, загварт засвар оржээ. Мөн ширээн дээрх цайны аяга байхгүй болсныг харж болно.
Түгээсэн зургийг ChatGPT-ээр үүсгэсэн зурагтай харьцуулахад ижил, төстэй зураг гарч ирлээ.
Эх зургийг хиймэл оюун ухаанд (ChatGPT-5.2) заавар өгч өөрчлөхийг хүсэхэд дараах зургийг өглөө. Тус зураг нь түгээсэн зурагтай төстэй, мөн адил арын бор сандал, ширээн дээрх аягыг арилгасан зэрэг шинж тэмдгүүдээрээ ижил байна.
Соёл, спорт, аялал жуулчлал, залуучуудын сайд Ч.Ундрам пост оруулжээ
2025 оны 12 дугаар сарын 21-нд Соёл, спорт, аялал жуулчлал, залуучуудын сайд Ч.Ундрам цахим хуудсандаа түгээсэн зургийг технологийн хэрэгсэл ашиглан эвлүүлж түгээснийг мэдэгдэхийн зэрэгцээ иргэдийг худал мэдээлэлд автахгүй байхыг уриалж, хууль хяналтын байгууллагуудыг энэ төрлийн зөрчилд анхаарал хандуулан шалгаж, хариуцлага тооцож байхыг хүсжээ.
Дүгнээд хэлбэл, цахим орчинд УИХ-ын гишүүн, сайд, Ерөнхийлөгчийн зураг, бичлэгт засвар хийж, ташаа агуулгатай түгээн харлуулж, иргэдийг турхирах явдал түгээмэл байдаг. Иймд та ямарваа зураг, бичлэгтэй мэдээ, мэдээллийг эх сурвалжтай нь тулган шалгаж, хэрсүү байхыг зөвлөе.
Бид өмнөх баримт шалгалтуудаар ерөнхийлөгч асан Ц.Элбэгдорж, УИХ-ын гишүүн Ч.Лодойсамбуу, Ж.Баярмаа, Б.Мөнхсоёл нарын зураг, бичлэгт засвар оруулан түгээж байсныг энд, энд, эндээс үзээрэй.
