2025 оны хоёрдугаар сарын 18-ны өдөр Хэрэгцээт бараа өргөн сонголт (архивлагдсан хувилбар) гэх хаягаас “…Тамхинаас ердөө 20-30 хоногийн дотор гаргана, Японы Kanyehb брэндийн Quit smoking гэх бүтээгдэхүүн…” гэсэн агуулгатай бичлэг нийтэлжээ. Уг пост 6,600 гаруй реакц, 4,500 сэтгэгдэл авчээ.
FACTCHECK: Бид дараах байдлаар баримт шалгалт хийлээ
“Kanyehb Quit smoking cream” гэх бүтээгдэхүүний аюулгүй байдал, үр нөлөөг шинжлэх ухааны үндэслэлтэйгээр баталгаажуулах клиник судалгаа одоогоор байхгүй байна
Тус бүтээгдэхүүнийг зургаар хайхад онлайн худалдааны вэбсайтад байршуулсан зарууд илэрлээ.
Made-in-China гэх Хятадын онлайн худалдааны сайт дахь KanyeHB брэндийн тамхинаас гаргах тосны танилцуулгад, “Судалгааны үр дүнгээр олон улсын хэмжээнд тамхинаас гарахад хамгийн үр дүнтэй арга нь никотины тос гэж үздэг хэмээн зарим эх сурвалжид дурдсан байдаг” гэжээ. Гэвч энэ төрлийн албан ёсны судалгаа олдоогүй.
Олон улсын хэмжээнд никотиний наалт/патч дээр клиник туршилтууд хийж, тамхинаас гарахад үр дүнтэйг баталсан байдаг. Харин никотин агуулсан тос/крем/гель төрлийн бүтээгдэхүүний найрлага, үр нөлөө, аюулгүй байдалд зориулсан бие даасан, хянагдсан клиник туршилт одоогоор байхгүй байна.
Мөн бичлэгт Японы KanyeHB брэнд хэмээн сурталчилж байгаа боловч онлайн худалдааны сайтад гарал үүслийг нь Хятад улс гэж тэмдэглэжээ.
АНУ-ын Хүнс, эмийн захиргаанаас гаргасан никотин орлуулагч бүтээгдэхүүний жагсаалтад тосон бүтээгдэхүүн байхгүй байна
АНУ-ын Хүнс, эмийн захиргаа (FDA)-наас тамхинаас гарахад ашиглахыг зөвшөөрсөн бүтээгдэхүүний жагсаалтад наалт, бохь, чихэр, хамрын шүршигч, амьсгалын аппарат болон жороор олгодог зарим төрлийн эмийн бэлдмэл багтжээ. Эдгээр нь FDA-аас аюулгүй байдал, үр нөлөөг нь үнэлсний дараа хэрэглээнд нэвтрүүлсэн, шинжлэх ухаанаар нотлогдсон арга хэрэгсэл юм.
Харин “Quit Smoking Cream” зэрэг тосон төрлийн бүтээгдэхүүн FDA-ийн доорх жагсаалтад байхгүй байна.
Дүгнэхэд, “Kanyehb Quit Smoking Cream” гэх бүтээгдэхүүн нь тамхинаас гарахад үр дүнтэй эсэхийг батлах шинжлэх ухааны нотолгоо, клиник судалгаа одоогоор байхгүй байна. Мөн бүтээгдэхүүнийг “Японы брэнд” гэж сурталчилж байгаа ч онлайн худалдааны сайтад гарал үүсэл нь Хятад хэмээн тэмдэглэгдсэн байна.
