"Архинаас гаргах наалт" гэх хуурамч бүтээгдэхүүн, цахим залиланд бүртгэлтэй данс зэргээс болгоомжил

“Архинаас гаргах наалт” гэх хуурамч бүтээгдэхүүн, цахим залиланд бүртгэлтэй данс зэргээс болгоомжил

#FactCheckedByMFCC | Шалгасан кэйсийн дугаар 1659

Шалгасан: MFCC
2025-11-12

Checked by: MFCC

Ерөнхий агуулга

“Биеэс хор гадагшлуулж, архи уух зуршлыг багасгаж, архинаас гаргах наалт” гэх бүтээгдэхүүний талаар мэдээлэл түгээжээ.

Баримт шалгалтын үр дүн

Олон дагагчтай хуудаснаас шинжлэх ухааны судалгаагаар нотлогдоогүй, баталгаагүй бараа бүтээгдэхүүний талаар сурталчилж, цахим залилангийн бүртгэлтэй дансаар дамжуулан захиалга авч байна.

Энэхүү мэдээлэлд Мета компанийн Хөндлөнгийн баримт шалгах хөтөлбөрийн хүрээнд тэмдэглэгээ зүүж анхааруулсан болно. (Дэлгэрэнгүйг энд болон эндээс уншина уу.)

2025 оны хоёрдугаар сарын 11-нд NARAN online shop Ub нэртэй хуудаснаас “Биеэс хор гадагшлуулж, архи уух зуршлыг багасгаж, архинаас гаргах наалт” гэх бүтээгдэхүүний талаар сурталчилсан бичлэг нийтэлсэн ба дахин шэйрлэж идэвхжүүлж байна. Уг бичлэг 680 реакц, 219 сэтгэгдэл авч, 1500 гаруй удаа цааш түгээгджээ.

FACTCHECK: Бид дараах байдлаар баримт шалгалт хийлээ

“Архинаас гаргах наалт” гэх бүтээгдэхүүнийг баримтаар шалгаж худал хэмээн дүгнэсэн.

Бид өмнөх баримт шалгалтаараа биеийг хоргүйжүүлж, архинаас гаргах наалтыг шинжлэх ухааны судалгаагаар бүрэн нотлоогүй , баталгаагүй бүтээгдэхүүн хэмээн мэдээлж байсан. Дэлгэрүүлбэл, Pubmed, Google Scholar, ResearchGate зэрэг судалгааны сангаас “архинаас гаргах наалт” гэх түлхүүр үгээр хайхад бүтээгдэхүүний тухай, цаашлаад наалт нь цус цэвэрлэж, хор гадагшлуулдгийг баталсан судалгаа огт илрээгүй юм.

Иймд уг батлагдаагүй бүтээгдэхүүнийг борлуулахаар сурталчилж буй хаягийн мэдээллийг шалгалаа.

Тус хуудасны ил тод байдлын мэдээллийг шалгахад 2020 оны зургадугаар сарын 24-нд нээгдсэн, 123 мянган дагагчтай нь харагдаж байна. Мөн хуудасныхаа тайлбар хэсэгт хэд хэдэн төрлийн дансны дугаар бичиж, байршуулсныг Цагдаагийн байгууллагын “102 Police” аппликейшнаас хайж, нягталсан. Ингэхдээ шалгасан хуудасны тайлбарт буй мэдээллийг уг аппликейшны “цахим залилангийн гэмт хэрэгт бүртгэгдэж байсан дансны мэдээлэл шалгах” цэсээр хандаж, баталгаажуулав.

Хайлтын үр дүнд 5377030687 дугаартай хаан банкны данс цахим залилангийн гэмт хэрэгт бүртгэгдэж байсан нь илэрлээ.

Эдгээрийг нэгтгээд харвал, NARAN online shop Ub хуудас нь клиник туршилтаар нотлогдоогүй, баталгаагүй бүтээгдэхүүн сурталчилж, цахим залилангийн бүртгэлтэй дансаар захиалга авахаар оролдож байна. Энэ нь тухайн хуудасны баталгаатай байдалд эргэлзэх үндэслэл юм.

Иймээс онлайн худалдан авалт хийхдээ бүтээгдэхүүний шинж чанар, хаягийн мэдээллийг судлахаас гадна тухайн барааг зарж буй хүний дансыг цахим залилангийн гэмт хэрэгт бүртгэгдэж байсан эсэхийг “102 Police” аппликейшн ашиглан нягталж байгаарай.

Цагдаагийн байгууллагын “102 Police” аппликейшнаас цахим залилангийн бүртгэлд буй дансны мэдээлэл харах зааврыг зургаар харуулж байна.

Аливаа мэдээллийг хуваалцахаасаа өмнө #ЭхлээдБод #Think1st

Та бүхэн манай төвийн баримт нягталсан мэдээтэй холбоотой аливаа санал хүсэлт, залруулга хийлгэх болон бусад санал гомдлоо редакцын hello@mfcc.mn имэйл хаягаар ирүүлнэ үү.

ЭХ СУРВАЛЖ, ХОЛБООТОЙ НИЙТЛЭЛҮҮД

Шалгасан мэдээлэл (архивласан хувилбар)

Эх сурвалж:

Архинаас гаргах наалтыг судалсан баримт шалгалтын нийтлэл

Архинаас гаргах наалттай холбоотой судалгааг Pubmed сангаас хайсан илэрц

Архинаас гаргах наалттай холбоотой судалгааг Google Scholar сангаас хайсан илэрц

Архинаас гаргах наалттай холбоотой судалгааг Rese a rchGate сангаас хайсан илэрц

“102 Police” аппликейшны талаарх мэдээлэл

Ерөнхий агуулга

Хуваалцах

Бид Олон Улсын Баримт Шалгагчдын Сүлжээ (International Fact-Checking Network)-ний ёс зүйн кодын дагуу аливаа мэдээллийг баримтаар баталгаажуулан шалгадаг. Баримтаар шалгасан мэдээллээ #ҮНЭН, #ХУДАЛ, #ТӨӨРӨГДҮҮЛСЭН, #БҮРЭН БУС, #ЭВЛҮҮЛЭГ, #ЕГӨӨДӨЛ гэсэн зургаан төрлөөр ангилж, олон нийтэд үнэн бодит мэдээлэл түгээн ажиллаж байна.