2025 оны 10 дугаар сарын 28-нд Nutag.mn нэртэй Facebook пэйж “Та нар ийм юм харж байсан уу? Монголын газар нутгийг хордуулж дууслаа” гэх гарчигтай бичлэг түгээжээ. Тус бичлэгийг 81 реакц, 19 сэтгэгдлээр идэвхжүүлж, 46 удаа цааш түгээжээ.
FACTCHECK:
Монгол Улсад эгнээ тусгаарласан шар өнгийн тасархай зураас байхгүй
Түгээсэн бичлэгт харагдаж буй замын хөдөлгөөний урсгал тусгаарлах зураасыг үзвэл шар өнгөтэй байна.
- Бид Монгол Улсын Замын хөдөлгөөний дүрмийн замын тэмдэг, тэмдэглэгээг үзвэл зөвхөн дараах гурван тохиолдолд шар өнгөөр тэмдэглэнэ гэжээ.
Монгол Улсын Замын хөдөлгөөний дүрмийн 1 дүгээр хавсралтын 24-т “Шар өнгийн 7.4, 7.9, 7.17 тэмдэглэлээс бусад хэвтээ тэмдэглэл нь цагаан өнгөтэй байна.” хэмээн заажээ. Шар өнгөөр тэмдэглэх
- 7.4. түр зогсохыг хориглох,
- 7.9. удаан зогсохыг хориглох,
- 7.17. чиглэлийн тээврийн хэрэгслийн буудал, таксины зогсоол тэмдэглэдэг гэжээ.
Дүгнээд хэлбэл, Монгол Улсад замын хөдөлгөөний урсгал тусгаарлах тасархай зураасыг зөвхөн цагаан өнгөөр тэмдэглэдэг бөгөөд түгээсэн бичлэгт үүнийг шар өнгөөр тэмдэглэсэн байгаа нь Монголд биш гэдгийг нотолж байна.
Эх бичлэг нь хятад хэлээр ярьж байна
YouTube дээр “Thy office” нэртэй хаяг рийл оруулсан нь түгээсэн бичлэгийн эх хувилбар буюу Хятад хэлээр ярьж буй бичлэг байжээ. Тус бичлэгт хэлсэн үгийг орчуулбал “牛也是吃肉的啊” – “Үхэр ч бас мах иддэг юм байна” гэв.
“Үхэр хэдийгээр өвсөн тэжээлтэй, мах шингээх чадваргүй ч, кальци, фосфор зэрэг шим тэжээлийн дутагдалд орох үед өөр төрлийн хүнс буюу мах идэх боломжтой” хэмээн мал, бэлчээрийн холбогдолтой нийтлэл түгээдэг On Pasture вэбсайтад онцолжээ.
Дүгнээд хэлбэл, цахим орчинд гаднын бичлэгийг хуулж аван, аудиог нь сольж, Монголд болж буй мэтээр түгээж, агуулгыг нь өөрчлөн, төөрөгдүүлэх явдал түгээмэл байдаг. Иймд та аливаа эргэлзээтэй зураг, бичлэгтэй постыг Монголын баримт шалгах төвийн АСУУ чатбот руу илгээн шалгуулж байгаарай.
