2025 оны 10 дугаар сарын 12-ны өдөр Tech Vision авто машины хар хайрцаг (архивласан хувилбар) нэртэй Facebook хуудсаас “Шинэ зохицуулалтаар тээврийн хэрэгслийн даатгалын хугацаа дууссан бол 100.000₮-р торгодог болсон юм байна шүү. Жолооч та даатгалаа хийлгэж дүрмээ баримтлан хөдөлгөөнд оролцоорой” гэсэн тайлбартай бичлэг нийтэлжээ. Уг пост 1,400 гаруй реакц, 333 сэтгэгдэл авч, 647 удаа цааш түгээгджээ.
FACTCHECK: Бид дараах байдлаар баримт шалгалт хийлээ
Бид Албан журмын даатгагчдийн холбооноос шинэ зохицуулалтын талаар лавлахад, “Тээврийн хэрэгслийн даатгалыг хүн сайн дураараа даатгуулна. Харин жолоочийн хариуцлагын даатгалд заавал даатгуулах үүрэгтэй” хэмээн бидэнд мэдээлсэн юм.
Жолоочийн хариуцлагын албан журмын даатгалын тухай гарын авлагад Тээврийн хэрэгслийн даатгал болон жолоочийн хариуцлагын албан журмын даатгалын ялгааг тайлбарласныг доор орууллаа.
Мөн 2025 оны долдугаар сарын 9-ний өдөр батлагдсан Зөрчлийн тухай хуулийн 11.15 дугаар зүйлийн 7 дахь хэсэгт орсон нэмэлт өөрчлөлтөөр “Жолооч нь жолоочийн даатгалд даатгуулалгүйгээр тээврийн хэрэгслээ ашиглан замын хөдөлгөөнд оролцсон бол хүнийг нэг зуун нэгжтэй тэнцэх хэмжээний төгрөгөөр торгоно” гэж заасан байна.
Жолоочийн хариуцлагын албан журмын даатгалын хураамжийг тухайн тээврийн хэрэгслийн ангилал, зориулалт, даац, суудлын тоо, газарзүйн байршил мөн тээврийн хэрэгслийн өмчлөгч, үндсэн даатгуулагч болон хамтран даатгуулагч, жолоочийн туршлага, нөхөн төлбөр авсан түүх зэргийс хамааран тооцдог байна. Харин даатгалын суурь хураамж “А” ангиллын тээврийн хэрэгсэлд 12,500 төгрөг, “B” ангиллын тээврийн хэрэгсэлд 33,000 төгрөг байдаг аж.
Дүгнэхэд, 2025 оны 7 дугаар сарын 9-ний өдөр батлагдсан Зөрчлийн тухай хуулийн нэмэлт өөрчлөлтөөр “Жолооч нь жолоочийн даатгалд даатгуулалгүйгээр тээврийн хэрэгслээ ашиглан замын хөдөлгөөнд оролцсон бол хүнийг нэг зуун нэгжтэй тэнцэх хэмжээний төгрөгөөр торгоно” гэж заасан байна. Үүнийг жолооч сайн дурын үндсэн дээр даатгуулах “тээврийн хэрэгслийн даатгал” хэмээн төөрөгдүүлсэн мэдээлэл түгээжээ.
