2025 оны 10 дугаар сарын 13-нд Дэнс.мн Шинэбаяр нэртэй Facebook хаягаас “25-р суваг телевизийн сэтгүүлч Г.Мөнхтуул 16 нас хүрсэн охиныхоо хамт угаартаж амиа алдлаа” гэх тексттэй богино хэмжээний бичлэг нийтэлсэн ба бичлэгийн тайлбар хэсэгт “Их л хариуцлагатай, сэргэлэн, сайн хүн байсан. Галаа яаж зөв түлэхийг хүмүүст заах хэмжээний хашир хүн байв. Хөөрхөн охин нь Эх нялхасын сэхээнд ухаан орж сэргэсэн ч имрай аппарат байхгүй гээд өөр улсын эмнэлэг рүү зөөж харуулах явцад амьсгал хураасан байна...” гэх мэдээллийг нийтэлжээ. Тус бичлэгийг нийт 977 реакц, 288 сэтгэгдлээр идэвхжүүлж, 118 удаа цааш түгээжээ.
FACTCHECK: Бид дараах байдлаар баримт шалгалт хийлээ
2025 оны 10 дугаар сарын 08-нд сэтгүүлч Г.Мөнхтуул Facebook хаягтаа “Манай тeлeвизэд олон жил хамт ажилласан хөдөлмөрч, сайхан эгч минь, дөнгөж 16 нас хүрсэн охиныхоо хамт угаартаж амиа алдлаа…” хэмээн угаартаж нас барсан гэр бүлийн тухай мэдээлэл шэйрлэсэн. Харин Дэнс.мн Шинэбаяр хаяг тус постын текстийг авч “сэтгүүлч Г.Мөнхтуул угаартаж нас барсан” гэх агуулгатай хуурамч мэдээлэл түгээжээ.
Сэтгүүлч Г.Мөнхтуул албан ёсны хаягтаа өөрийн посттой холбоотой ташаа ойлголтуудыг залруулахаар 2025 оны 10 дугаар сарын 12-нд “Мэргэжил нэгтнүүдээсээ хүсьe! Намайг үхсэн мэтээр мэдээлж хандалтаа өсгөхөө зогсооно уу…” гэх постыг нийтлэж байсан.
Бид өмнөх “Хуурамч хаягаар сэтгүүлчийн зургийг ашиглан төөрөгдүүлжээ” баримт шалгалтаараа Дэнс.мн Шинэбаяр гэх хаяг нь сэтгүүлчийн зураг, нэрийг ашиглан нээсэн хуурамч хаяг болохыг мэдээлж байсан. Мөн сэтгүүлч А.Шинэбаяр Facebook хаягтаа “Дэнс.мн Шинэбаяр” хаягийг удирдаггүй хэмээн өнөөдөр буюу 10 дугаар сарын 13-нд дахин мэдэгдсэн байна.
Дээрх харьцуулсан зурагт Дэнс.мн Шинэбаяр гэх хуурамч хаягийн ID нэршил 2025 оны 05 дугаар сард 100088593581439 гэх кодтой байсан бол “dens.mn.sinebaar” хэмээн өөрчилжээ. Хэдий ID нэршлээ өөрчилсөн ч үсгийн алдаатай байгааг харж болох юм. Харин сэтгүүлч А.Шинэбаярын албан ёсны хаягийн ID “shinebayar.altai” гэх нэршилтэй байдаг.
Дүгнээд хэлбэл сэтгүүлч А.Шинэбаяр нь өөрийн оргинал хаягаараа бус харин түүний дуураймал хаяг сэтгүүлч Г.Мөнхтуулыг нас барсан хэмээх хуурамч мэдээллийг түгээсэн байна.
Сэтгүүлчийн болон мэдээллийн сайтын нэр, зургийг ашиглан, олон нийтэд төөрөгдүүлсэн ойлголт төрүүлэх зорилгоор хөтөлж, түгээдэг хэлбэрийг imposter content буюу дуураймал контент гэж нэрлэдэг. Уг аргаар хуурамч хаягийн ID нэршлийг сольж, жинхэнэ мэт харагдуулж, цаашлаад сэтгүүлч Г.Мөнхтуулыг нас барсан гэх хуурамч мэдээлэл түгээжээ.
