Search

Хөлөө бүлээн усанд дүрэх нь ханиадыг эмчлэхгүй

#FactCheckedByMFCC | Шалгасан кэйсийн дугаар 1606

Ерөнхий агуулга

Цагаан гаа, ганга, лаврын навчтай буцалгасан усанд хөлөө дүрэх нь ханиадыг 3 хоногт эдгээнэ гэх агуулгатай богино хэмжээний бичлэг түгээжээ.

Баримт шалгалтын үр дүн

Ганга, цагаан гаа, лаврын навчтай усанд хөлөө дүрэх нь ханиадыг эмчлэхийг харуулсан шинжлэх ухааны нотолгоо, судалгаа байхгүй. Хөлөө бүлээн усанд дүрэх нь шууд хор хөнөөлгүй ч цаг хугацаа алдах, өвчин хүндрэх эрсдэлтэй тул заавал эмчид үзүүлж, мэргэжлийн зөвлөгөө аваарай.


Энэхүү мэдээлэлд Мета компанийн Хөндлөнгийн баримт шалгах хөтөлбөрийн хүрээнд тэмдэглэгээ зүүж анхааруулсан болно. (Дэлгэрэнгүйг энд болон эндээс уншина уу.)

2025 оны 09 дүгээр сарын 18-нд Mungunchimeg Tumurbaatar нэртэй хаягаас “Гурван хоногт ханиадыг нам дарах арга” гэх гарчигтай богино хэмжээний бичлэг түгээжээ. Тус бичлэгт “Ганга, цагаан гаа, лаврын навч гурвыг буцалгаж хандлаад ханданд нь хүүхдийн хөлийг дүрнэ.  Хөлийг дүрэхдээ дээгүүр нь алчуураар бүтээж халуун хэвээр байлгана. 15 минут байлгасны дараа хүүхдийн хөлийг салхи авахуулахгүй ороож, арчаад, шар тосоор шилбэний булчин, хөлийн ул хэсгийг массажилна” гэж ярьсан байна. Тус бичлэгийг нийт 10,900 гаруй реакц, 247 сэтгэгдлээр идэвхжүүлж, 14,000 гаруй удаа цааш түгээжээ.

Ганга, цагаан гаа, лаврын навчтай усанд хөлөө дүрэх нь ханиадыг эмчлэхийг харуулсан шинжлэх ухааны нотолгоо, судалгаа байхгүй

Шалгасан мэдээлэлд  дурдсан орцны дагуу “ганга, цагаан гаа, лаврын навч” гэх түлхүүр үгээр Google Scholar, PubMed, ScienceDirect, Whiley Online library, JSTOR, ResearchGate зэрэг судалгааны сангаас хайхад эдгээр орцыг усанд буцалгаж хөлөө дүрэх нь ханиадыг эмчилдэг тухай судалгаа, үр дүнтэй баталсан нотолгоо байхгүй байна.

Австралийн ABC News мэдээллийн сайтад орсон “Ханиад, томуугийн шинж тэмдэгтэй тэмцэх гэрийн эмчилгээ нь тайвшруулах боловч эдгээх арга биш юм” нийтлэлд шалгасан мэдээлэлтэй төстэй “хүүхдийн хөлийг бүлээн усаар угааж, эвкалипт тосоор хөлийн ус, хурууг тосолж, массажлах ” гэх ханиад эмчлэх аргыг дурджээ. Гэвч Австралийн Хатан хааны ерөнхий эмч нарын коллежийн ерөнхийлөгч Карен Прайс “ханиад эмчлэх уламжлалт бус эмчилгээг (альтернатив эмчилгээ) батлах шинжлэх ухааны нотолгоо байхгүй тул маш болгоомжтой авч үзэх хэрэгтэй. Гэрийн эмчилгээ тайвшруулах ч бүрэн эмчлэхгүй юм. Зарим хүмүүс плацебо нөлөөгөөр эерэг үр дүнтэй байж болох ч эдгээхгүй юм” хэмээн тайлбарлажээ.

Бид өмнөх “Хөлөө халуун усанд дүрэх нь тайвшруулах үйлчилгээтэй хэдий ч биеэс хорыг гадагшлуулахгүй”, “Хөлөө ямар нэг бодистой усанд дүрж биеийг хоргүйжүүлэх батлагдсан арга, шинжлэх ухааны нотолгоо байхгүй” баримт шалгалтдаа хөлөө халуун бүлээн усанд дүрэх нь цусны эргэлтийг нэмэгдүүлж, тайвшруулах үйлчилгээтэйг харуулсан хэд хэдэн судалгаа дурдсан билээ. Гэвч шалгасан мэдээлэлд дурдсан аргаар ханиад, томууг бүрэн эмчлэх нь шинжлэх ухааны баталгаагүй арга юм.

Хөлөө бүлээн усанд дүрэх нь шууд хор хөнөөлгүй ч цаг хугацаа алдах, өвчин хүндрэх эрсдэлтэй тул заавал эмчид үзүүлж, мэргэжлийн зөвлөгөө аваарай.


Аливаа мэдээллийг хуваалцахаасаа өмнө #ЭхлээдБод #Think1st


Та бүхэн манай төвийн баримт нягталсан мэдээтэй холбоотой аливаа санал хүсэлт, залруулга хийлгэх болон бусад санал гомдлоо редакцын hello@mfcc.mn имэйл хаягаар ирүүлнэ үү.

Leave a Reply

Your email address will not be published. Required fields are marked *

Ерөнхий агуулга

Цагаан гаа, ганга, лаврын навчтай буцалгасан усанд хөлөө дүрэх нь ханиадыг 3 хоногт эдгээнэ гэх агуулгатай богино хэмжээний бичлэг түгээжээ.

Хуваалцах

Бид Олон Улсын Баримт Шалгагчдын Сүлжээ (International Fact-Checking Network)-ний ёс зүйн кодын дагуу аливаа мэдээллийг баримтаар баталгаажуулан шалгадаг. Баримтаар шалгасан мэдээллээ #ҮНЭН, #ХУДАЛ, #ТӨӨРӨГДҮҮЛСЭН, #БҮРЭН БУС, #ЭВЛҮҮЛЭГ, #ЕГӨӨДӨЛ гэсэн зургаан төрлөөр ангилж, олон нийтэд үнэн бодит мэдээлэл түгээн ажиллаж байна.

Check document