2025 оны 09 дүгээр сарын 19-нд “Гашуун үнэн амттай” нэртэй Facebook пэйж “О.Номинчимэг: Цалинтай ээжийн 50,000 төгрөгийг нэмэх битгий хэл хасах санал гаргаж байгаа” гэх гарчигтай пост түгээжээ. Тус постыг 86 реакц, 62 сэтгэгдлээр идэвхжүүлж, 524 удаа цааш түгээжээ. Үүнтэй ижил агуулгатай постыг мөн түгээснийг энд, эндээс үзээрэй.
FACTCHECK: Бид дараах байдлаар баримт шалгалт хийлээ
2025 оны 03 дугаар сарын 26-нд УИХ-ын гишүүн О.Номинчимэг “П.Үүрийнтуяа гишүүний хэлсэнчлэн цалинтай ээжийн 50 мянган төгрөгийг 500 мянган төгрөг болгох төсвийн орон зай манай өнөөгийн нөхцөлд байхгүй. “Цалинтай ээж”-ийн мөнгө бол цалин биш, тэгэхээр цалинтай ээж гэж хөтөлбөрөө нэрлэхээ болих хэрэгтэй. Бид харин эмэгтэйчүүдийг хүүхдээ харангаа ажил хөдөлмөр эрхлэх боломж өрхийн орлого, ЖДҮ гэх мэт энэ боломжуудыг нь нээх тэр асуудал дээр илүү бодлогын хувьд анхаарч ажиллах ёстой гэж хувь хүнийхээ хувьд харж байгаа…” гэж хэлснийг энд, энд, эндээс үзээрэй.
Мөн 2025 оны 09 дүгээр сарын 22-нд УИХ-ын О.Номинчимэг өөрийн Facebook пэйжид “Цалинтай ээж хөтөлбөрийг зогсоох тухай миний бие ерөөс хөндөөгүй, харин нэрдээ авцалдахгүй байгаа энэ хөтөлбөрийн нэрийг солих нь зүйтэй гэдгийг хэлсэн” гэсэн тайлбар пост оруулжээ.
Дүгнээд хэлбэл, УИХ-ын гишүүн О.Номинчимэгийн “цалинтай ээж” хөтөлбөрийн 50 мянган төгрөгийг 500 мянган төгрөг болгох төсвийн боломж байхгүй, мөн нэрийг нь солих хэрэгтэй гэх агуулгатай хэлсэн үгийг нь “УИХ-ын гишүүн О.Номинчимэг: цалинтай ээжийн 50 мянган төгрөгийг зогсоох ёстой. Төсөв хүрэхгүй байна” хэмээн түгээж төөрөгдүүлжээ.
Ташрамд дурдахад, 2023 оны 10 дугаар сарын 18-нд иргэн Р.Цэндсүрэн “Цалинтай ээж гэж нэрлэж байгаа 50,000 төгрөгийг нэмэгдүүлэхийг дэмжиж байна уу” гэсэн гарчигтай өргөдлийг УИХ-ын Тамгын газрын эрхлэн хөтөлдөг Нийтийн өргөдөл гомдлын системд байршуулж, 102,808 иргэний санал авч дэмжигдсэн.
