2025 оны 09 дүгээр сарын 05-нд Today Information гэх Facebook пэйж ““Сибирийн хүч-2”-т хийн хоолой барихад хөрөнгө оруулалт хийснээр тогтвортой орлого олох болно” гэх агуулгатай постыг бичлэгийн хамт түгээсэн нь 595 реакц авчээ.
FACTCHECK: Бид дараах байдлаар баримт шалгалт хийлээ
Түгээсэн бичлэгийг Google Lens ашиглан хайхад, 2024 оны 02 дугаар сарын 29-нд MONGOL TV-ийн Хар хайрцаг нэвтрүүлэгт Монгол улсын шадар сайд, УОК-ын дарга С.Амарсайханы оролцож, өвөлжилт, хаваржилтын хүндрэл, түүний үр нөлөө, авч хэрэгжүүлж буй арга хэмжээний талаар ярилцсан хэсгээс авчээ. Тэгвэл тус нэвтрүүлгийн хэсгээс авч, хиймэл оюун ухааны Deepfake технологи ашиглан амны хайрцгийг өөрчилж, орос хэлээр дуу оруулан түгээжээ.
Түгээсэн бичлэгийн хэсгийг Hive Moderation хэрэглүүрээр шалгахад 99.9 хувийн хиймэл оюун ухаан буюу Deepfake технологи ашиглан хийсэн гэсэн үр дүн гарлаа.
Дээрх Deepfake технологи ашиглан өөрчлөн түгээсэн бичлэгт “Холбоос дээр дарж орон бүртгүүлээд, “Сибирийн хүч-2”-т хөрөнгө оруулалт хийгээд мөнгөө өсгөөрэй” гэх агуулгыг бүртгэлийн вэбсайтын хамт дурджээ. Бид тус бүртгэлийн вэбсайт руу орж үзэхэд овог, нэр, имэйл хаяг, утасны дугаар зэрэг хувийн мэдээлэл шаардахаас гадна уг вэбсайтад ямар нэг холбоо барих дугаар, хаяг, цэс байхгүй байгаа нь залилангийн шинж чанарыг агуулж байна.
Эдгээрээс үзвэл, Монгол Улсын Шадар сайд, УОК-ын дарга С.Амарсайханы ярилцлагын хэсэгт Deepfake технологиор дуу оруулж хүмүүст итгэл төрүүлснээр, хувийн мэдээлэл цуглуулах залилан үйлдэж байна. Иймд манай өмнөх баримт шалгалттай танилцаж, Deepfake технологиор хийсэн бичлэгийг хэрхэн таних аргад суралцаарай.
