2025 оны 08 дугаар сарын 28-нд Narantuya Tserendorj (архивласан хувилбар) нэртэй Facebook хаягаас “Сэлэнгэ Эг тарвагатайн бэлчир” гэх тайлбартай усанд халим загас сэлж буй богино хэмжээний бичлэг нийтэлжээ. Тус бичлэгийг нийт 1,300 гаруй реакц, 96 сэтгэгдлээр идэвхжүүлж, 133 удаа цааш түгээжээ.
FACTCHECK: Бид дараах байдлаар баримт шалгалт хийлээ
Түгээсэн бичлэгийн хэсгийг Google Lens хайлтын системээр хайхад Facebook, TikTok-ийн хэд хэдэн хаягт “…Халимны нүүдэл…” гэх тайлбартай нийтэлжээ.
Харин тавдугаар сарын 17-нд Recreational013 гэх TikTok хаягаас оруулсан тус халимны бичлэг өндөр хандалт авсан байна. Бичлэгийн тайлбарт байршлыг нь “Синнурис” хэмээн тэмдэглэсэн ч сэтгэгдэл хэсэгт нь “Энэ нь гол биш, энэ бол Додд Нарроус юм. Тэд Ванкувер арал ба Мудж арлын хооронд сэлж байна” гэжээ.
Бид үргэлжлүүлэн “Додд Нарроус” гэх түлхүүр үг ашиглан Google хайлтын системээс хайж үзэхэд бичлэгт гарч буй байгалийн тогтоц нь “Додд Нарроус” усан хоолойтой яг адил байгааг тогтоолоо. Dodd Narrows нь Канадын Ванкувер арал ба Мудж арлын хоорондох усан хоолой бөгөөд тус усан хоолойн хэсгээр халимнууд нүүдэллэн дайрч өнгөрдөг онцлогтой байна.
Үүнээс гадна халим буюу далайн сүүн тэжээлтэн амьтад нь зөвхөн давстай усанд амьдрах чадвартай бөгөөд цэнгэг усанд урт хугацаагаар амьдрах боломжгүй. Иймээс Монголын Сэлэнгэ мөрөн, Эгийн голд халим байх нь биологийн болон экологийн хувьд боломжгүй юм.
Дүгнэхэд, “Сэлэнгэ Эг тарвагатайн бэлчир” гэх тайлбартайгаар цахим орчинд түгсэн, халимны бичлэг нь Канадын Ванкувер арал ба Мудж арлын хооронд орших “Додд Нарроус” хэмээх усан хоолойд авсан дүрс бичлэг юм. Мөн халим нь зөвхөн давстай усанд амьдрах биологийн онцлогтой тул Сэлэнгэ мөрөн, Эгийн гол зэрэг цэнгэг усны экосистемд удаан хугацаагаар амьдрах боломжгүй.
