2025 оны 06 дугаар сарын 20-нд TUTTU Mongolia гэх дуураймал, хуурамч пэйжээс сурталчилгааны бичлэг оруулсан нь 1200 гаруй реакц, 464 сэтгэгдэл авч, 502 удаа цааш түгээгджээ.
FACTCHECK: Бид дараах байдлаар баримт шалгалт хийлээ
TUTTU Mongolia нь онлайнаар худалдаа хийдэг, Facebook платформд 269 мянган дагагчтай пэйж юм. Facebook хуудсандаа бичсэнээр бол хоёр салбартай, холбогдох дугаар нь 7774-7766 гэжээ. Харин үүнийг дуурайлган нэр, профайл зураг зэргийг ашиглаж нээсэн тус бүр 550, 490, 10 дагагчтай гурван хуурамч пэйжийг бид илрүүлэн доор жагсаалаа.
- Хуурамч пэйж 1 (550 дагагчтай, 2025-06-20-нд нээгдсэн)
- Хуурамч пэйж 2 (490 дагагчтай, 2025-07-19-нд нээгдсэн)
- Хуурамч пэйж 3 (10 дагагчтай, 2025-08-23-нд нээгдсэн)
2025 оны 05 дугаар сарын 29-нд оруулсан TUTTU Mongolia-ийн бичлэгийг 2025 оны 06 дугаар сарын 20-нд Хуурамч пэйж 1 нь хуулбарлан оруулж, хүмүүсээс захиалгын мөнгө хэмээн MN880005005314786241 (Бат-Оргил Алтантуул) гэх дансаар авч, залилан үйлдэж байна.
TUTTU Mongolia-ийн мэдэгдэл болон сэрэмжлүүлэг
Бид TUTTU Mongolia-тай холбогдон энэ тухай тодруулахад “Бидний албан ёсны Facebook пэйж бол 269 мянган дагагчтай TUTTU Mongolia юм. Үүнээс гадна Tuttu Mongolia Эрдэнэт салбар, TUTTU Mongolia Хөвсгөл салбар, TUTTU Mongolia Баянхонгор Салбар, TUTTU Mongolia Uvs salbar, Tuttu mongolia Hovd, TUTTU Mongolia Дархан салбар нь манай албан ёсны салбар тус бүрийн пэйж юм. Бусад цөөн дагагчтай TUTTU Mongolia, Tuttu Mongolia гэх нэртэй пэйжүүд нь хуурамч, дуураймал бөгөөд хэрэв эргэлзээтэй байвал манай 7774-7766 дугаарт холбогдохыг хүсье” гэв.
Мөн 2025 оны 08 дугаар сарын 17-нд TUTTU Mongolia пэйждээ “72-оор эхэлсэн дугаараас болгоомжил‼ цахим луйвраас сэргийлж 72-той дугаартай бүү холбогдоорой” хэмээн сэрэмжлүүлсэн пост гаргажээ. Учир нь хуурамч пэйжүүдийн холбогдох дугаар нь 7270-5783 бөгөөд хүмүүс энэ дугаарт холбогдон залилуулж байна.
Иймд та онлайн худалдаа хийхдээ пэйжийн ил тод байдлыг харж, дагагчдын тоо, пэйж нээгдсэн огноо, хаяг, холбогдох дугаараа оруулсан эсэхийг шалгаж байхыг зөвлөе.
