2025 оны 08 дугаар сарын 10-нд Mu Bold (архивласан хувилбар) нэртэй хаягаас “АНУ-ын FDA нь нүдний шил хэрэглэхгүйгээр ойрын харааг засах боломжтой нүдний дуслыг зөвшөөрөв” гэх агуулгатай пост нийтэлжээ. Тус постыг 1,000 гаруй реакц, 34 сэтгэгдэлээр идэвхжүүлж, 407 удаа цааш түгээсэн байна.
Тухайлбал, “АНУ-ын Хүнс, Эмийн Захиргаа (FDA) LENZ Therapeutics-ийн бүтээсэн VIZZ хэмээх цоо шинэ нүдний дуслыг зөвшөөрч, нүдний шил хэрэглэхгүйгээр ойрын харааг эрс сайжруулдаг, 680 гаруй оролцогчид хамрагдсан 3-р үе шатны эмнэлзүйн туршилтын үр дүнгээс үзэхэд VIZZ өвчтөнүүдэд жижиг хэвлэмэл уншиж, ойрын зургийг хялбархан гүйцэтгэхэд тусалсан байна” гэжээ.
FACTCHECK: Бид дараах байдлаар баримт шалгалт хийлээ
АНУ-ын Хүнс, Эмийн Захиргааны сайт дахь 2025 оны шинэ эмийн зөвшөөрлүүдийн жагсаалтаас харахад “VIZZ” нүдний дусаалгыг 2025 оны 07 дугаар сарын 31-нд баталсан бөгөөд ойрын харааны эмгэгийг (пресбиопи) түр зуур эмчлэх зориулалттай, “ацеклидин” агуулсан хэмээн тэмдэглэжээ.
Мөн “ЛЕНЗ Терапьютикс” компанийн мэдээллийн сайтад “VIZZ нүдний дусаалгыг ойрын муудсан харааг (пресбиопи) сайжруулахад зориулагдсан, 10 хүртэл цагийн турш үр нөлөөгөө үзүүлнэ” хэмээн онцолжээ.
Тухайлбал, VIZZ нүдний дусаалгын пресбиопид үзүүлэх үр нөлөөг “CLARITY-1, CLARITY-2” судалгаагаар баталсан байна. Судалгаанд 45–75 насны 466 оролцогч оролцсон бөгөөд өдөрт нэг удаа, 2 дуслаар 42 хоногийн турш аюулгүй байдал болон үр дүнгийн хувьд үнэлжээ. Үр нөлөөг тунгийн дараах 10 цагийн хугацаанд судалгааны 1, 15, 28 дахь өдрүүдэд тодорхойлсон байна.
“CLARITY 1 болон 2 туршилтаар VIZZ нь ойрын харааг 30 минутын дотор сайжруулж, 10 цаг хүртэл хадгалах тогтвортой үр дүн үзүүлсэн. Мөн 3000 гаруй өдрийн хэрэглээнд эмчилгээнд холбоотой ноцтой сөрөг нөлөө илрээгүй” гэж тэмдэглэжээ. “Оролцогчдод хамгийн их илэрсэн гаж нөлөөнүүд нь нүдэнд дусаалга хийсэн хэсгийн цочрол (20%), бүдэг хараа (16%), толгой өвдөх (13%) байжээ. Мөн ихэнх гаж нөлөө нь хөнгөн, түр зуурын шинжтэй, өөрөө арилдаг байв” хэмээн АНУ-ын Хүнс, Эмийн Захиргааны мэдээллийн сайтад дурдсан байна.
Түүнчлэн VIZZ нь ацеклидин агуулсан 1.44% концентраци бүхий нүдний дусаалга бөгөөд ацеклидин нь нүдний солонгон бүрхүүлийн (iris) булчинг агшаадаг байна. Тухайлбал, солонгон бүрхүүлийн булчин нь гэрлийн хэмжээг зохицуулах үүрэгтэй байдаг аж. Ирисийн булчин агшихад pupil буюу нүхний хэмжээ багасаж, нүд рүү орж ирэх гэрлийг тохируулдаг. Үүний үр дүнд нүдний фокус гүнзгийрч, ойрын хараа тод болдог байна.
Пресбиопи буюу нас ахихтай холбоотой ойрын хараа муудах нь нүдний болрын уян хатан чанар аажмаар буурснаас үүддэг
“Пресбиопи нь нас ахихтай холбоотойгоор нүдний болрын уян хатан чанар алдагдаж, ойр холын зүйлд фокус тааруулах аккомодацийн чадвар буурснаар ойрын зүйлсийг тод харах чадвар аажмаар муудах физиологийн өөрчлөлт юм” гэж АНУ дахь Мэйо клиникийн мэдээллийн сайтад тайлбарлажээ.
Насжилттай холбоотой ойрын хараа муудах (пресбиопи) үед нүдний шил болон контакт линз зүүхийг эмч нар санал болгодог ба зарим тохиолдолд мэс заслын аргыг санал болгодог байна. Харин аливаа нүдний дусаалга нь пресбиопыг бүр мөсөн эмчлэх эсвэл хараа муудалтыг удаашруулахгүй бөгөөд түр хугацаанд нүдний шил эсвэл линз зүүхгүй байхад тусалж чаддаг, түр хугацаанд буюу ойролцоогоор 10 цаг хүртэл ойрын харааг сайжруулахад нөлөөтэй байна.
