2025 оны долоодугаар сарын 22-ны өдөр Zorigtbaatar Nergui Borjigon нэртэй хуудаснаас “Насанд хүрсэн 10 эмэгтэй тутмын 7 архаг, бэлгийн замын өвчтэй байна гэнэ үү? Аймшиг. Итгэдэг хайрладаг хүнээсээ өвчин авна гэдэг аймшиг” гэсэн тайлбартай пост нийтэлжээ. Уг пост 186 реакц, 53 сэтгэгдэл авч, 22 удаа цааш түгээгджээ.
FACTCHECK: Бид дараах байдлаар баримт шалгалт хийлээ
Уг мэдээлэлд буй тоон мэдээлэл нь бөөр, шээсний замын халдварт өвчний тохиолдлыг илэрхийлсэн ба дээрх мэдээлэлд тоон мэдээллийг бэлгийн замын халдварт өвчинтэй (БЗХӨ) холбон төөрөгдүүлэн түгээсэн байна. Тодруулбал, 2025 оны долоодугаар сарын 21-ий өдөр NTV телевизээр манай улсын иргэдийн дунд шээс, бэлгийн замаар халдварлах өвчний тархалт их байгаа талаар мэдээлсэн. Уг мэдээнд Улсын Хоёрдугаар Төв эмнэлгийн бөөрний мэс заслын тасгийн эрхлэгч А.Ханхонгор “Бөөр, шээсний замын халдвар нь 10 эмэгтэй тутмын 7-д архаг халдвар хэлбэртэй байдаг. Үүнээс хүндрэх эрсдэлтэй нь архаг, хууч өвчтэй, бөөр, шээсний замын эмгэгтэй, сахрын суурь өвчтэй хүмүүс бий. Үүнийг дагаад эмчлэхэд хэцүү үе шат руу шилжиж бөөр буглаж, бөөр авах хагалгаа хийх шаардлагатай болдог. Мөн сүүлийн үед бэлгийн замын халдварт өвчин нэмэгдэж байна.” гэжээ.
Edoctor цахим эмчийн зөвлөгөө хүргэдэг сайтад хүний их эмч Д.Цолмон уг халдварын талаар “Өгсөх замын халдвар гэдэг нь халдварлуулагч нян шээсний суваг эсвэл давсгаас дээш бөөр лүү дамжиж бөөрийг үрэвсүүлдэг шээсний замын халдвар юм. Бөөрний өгсөх замын халдварыг эмчийн хяналтад сайн эмчлэх хэрэгтэй. Хэрэв дутуу эмчилбэл бөөрийг хүнд гэмтээж, цусны урсгалаар бактери тархах, цаашлаад амь насанд аюултай нөхцөл үүсдэг” гэж тайлбарлажээ.
Бөөр, шээсний замын халдвар нь ихэвчлэн өтгөнөөс гаралтай бактериас (E.coli г.м) болж үүсдэг бөгөөд шээсний суваг руу бактери орж халдвар үүсгэснээр дээшилж бөөр, бусад эрхтнүүдийг өвчүүлдэг байна. Эмэгтэй хүний шээсний суваг эрэгтэй хүнийхээс богино байдаг тул бактери давсаг болон бөөрөнд илүү амархан хүрч, халдварлах эрсдэлтэй байдаг. Өөрөөр хэлбэл бөөр, шээсний замын халдварыг БЗХӨ гэж шууд дүгнэх боломжгүй. Уг халдварт өртөх эрсдэлийг нэмэгдүүлдэг хүчин зүйлсэд бэлгийн хавьтал багтдаг ч тухайн халдварын голлох шалтгаан нь бие доторх нян, бактерийн өсөлтөөс үүдэлтэй байдаг.
Үүнээс үзэхэд бидний шалгасан мэдээлэлд бөөр, шээсний замын халдварын талаарх тоон мэдээллийг БЗХӨ мэтээр тайлбарлаж, төөрөгдүүлсэн мэдээлэл түгээжээ.
