2025 оны 07 дугаар сарын 05-нд Tserenkhuu Ishtseden (архивласан хувилбар) нэртэй Facebook хаяг вакцинжуулалтын улмаас хүүхэд саажилттай болсон тухай агуулга бүхий мэдээллийг нийтэлжээ. Постод тэмдэглэснээр “Ой хүрээгүй эрүүл хүүхэд товлолт хийлгээд бүтэн саажсан тохиолдол 2 дахиа ирлээ Би тов. вакцин эсэргүүцэгч биш, анфилактик харшилтай эсэхий нь сайтар нягтлаачээ л гэж Ер нь 2 ойтойгоос хийвэл яасын бэ?” гэсэн пост нийтэлжээ. Тус пост 789 реакц, 190 сэтгэгдэл авч, 400 удаа цааш түгээгджээ.
FACTCHECK: Бид дараах байдлаар баримт шалгалт хийлээ
Халдварт өвчин судлалын үндэсний төвөөс (ХӨСҮТ) бидэнд мэдээлснээр, Монгол Улс улаанбурханы эсрэг дархлаажуулалтын хөтөлбөртөө Энэтхэгийн Serum Institute of India (SII)‑ийн MR‑VAC вакциныг ашиглаж байна.
Энэ талаар Нэгдсэн Үндэстний Байгууллагын Хүүхдийн сангийн төлөөлөгч мэдэгдсэн ба тэрээр 07 дугаар сарын 01-нд өсгөн ярилцлагадаа “Монгол Улсад хэрэглэгдэж буй улаанбурхан болон бусад товлолын вакциныг Нэгдсэн Үндэстний Байгууллагын Хүүхдийн сан олон улсын стандартад нийцүүлэн худалдан авч, түгээж байна. Эдгээр вакцины худалдан авалт нь Дани улсад байрлах UNICEF-ийн Хангамжийн хэлтсээр дамжуулан хийгддэг бөгөөд зөвхөн Дэлхийн эрүүл мэндийн байгууллагын хүлээн зөвшөөрсөн, чанарын өндөр шаардлага хангасан вакцин үйлдвэрлэгчдээс авдаг” хэмээн НҮБ-ын хүүхдийн сангийн суурин төлөөлөгч Эваристе Коуасси Комланмэдэгдсэн тухай iToim мэдээллийн сайт мэдээлжээ.
Энэтхэгийн Serum Institute of India (SII)‑ийн MR‑VAC вакцины гаж нөлөөний тухай мэдээлэл
Улаанбурхан, улаануудын эсрэг Biological E компанийн BE-MR вакцины аюулгүй байдал, үр нөлөөг 9–12 сартай 600 нярайд хийсэн судалгаагаар Энэтхэгийн SII MR-Vac™ вакцинтай харьцуулан үнэлэхэд, ижил түвшний дархлааны хариу үзүүлдэгийг тогтоожээ. Вакцин дархлаа хамгаалалт өндөр, ноцтой гаж нөлөөгүй байсан бөгөөд нэг нас хүрээгүй нярайд аюулгүй тарьж болохыг судалгааны баг дүгнэсэн байна. Харин судалгаанд оролцсон нийт 600 хүүхдээс 137 хүн (22.83%) ямар нэгэн гаж нөлөө илэрсэн тухай мэдээлсэн ба үүнд голдуу тарилгын хийсэн хэсэгт улайх, өвдөх, хөндүүрлэх, хавдах, халуурах гэх мэт шинж тэмдэгүүд илэрсэн байна. Үүнээс:
- 64 хүн (21.33%) нь BE компанийн MR вакцин хийлгэсэн бүлгээс,
- 73 хүн (24.33%) нь SIIL MR‑Vac™ вакцин хийлгэсэн бүлгээс байжээ
Доорх хүснэгтэд BE компанийн MR вакцин болон SIIL (Serum Institute of India)-ийн MR-Vac™ вакцины гаж нөлөөг анатомийн тогтолцооны ангилал, эмнэлзүйн нэршлээр ангилж, гаж нөлөө илэрсэн хувь хэмжээг харьцуулан үзүүлэв.
| Системийн ангилал (SOC) | Эмнэлзүйн нэршил (PT) | BE-ийн MR вакцин (n=300) | SIIL MR-Vac™ (n=300) |
|---|---|---|---|
| Гаж нөлөө илэрсэн оролцогч | — | 64 (21.33%) | 73 (24.33%) |
| Хоол боловсруулах тогтолцооны эмгэгүүд | — | 2 (0.67%) | 4 (1.33%) |
| Суулгалт | 1 (0.33%) | 1 (0.33%) | |
| Бөөлжих | 1 (0.33%) | 3 (1.00%) | |
| Ерөнхий шинжүүд ба тарилгын урвалууд | — | 59 (19.67%) | 61 (20.33%) |
| Уйлах | 9 (3.00%) | 8 (2.67%) | |
| Тарилгын хэсэгт улайх | 10 (3.33%) | 7 (2.33%) | |
| Тарилыгн хэсэгт хатуурах | 1 (0.33%) | 2 (0.67%) | |
| Тарилгын хэсэг өвдөх | 15 (5.00%) | 18 (6.00%) | |
| Хөндүүрлэх (мэдрэхүйгээр өвдөх) | 3 (1.00%) | 5 (1.67%) | |
| Загатнах | 1 (0.33%) | 0 | |
| Хавдах | 10 (3.33%) | 12 (4.00%) | |
| Тайван бус болох, цочромтгой | 11 (3.67%) | 9 (3.00%) | |
| Халуурах | 19 (6.33%) | 13 (4.33%) | |
| Халдвар ба халдварт өвчин | — | 4 (1.33%) | 9 (3.00%) |
| Гастроэнтерит | 0 | 2 (0.67%) | |
| Насофарингит (хамрын болон залгиурын үрэвсэл) | 4 (1.33%) | 6 (2.00%) | |
| Амьсгалын замын халдвар | 0 | 1 (0.33%) | |
| Бодисын солилцоо, хооллолтын эмгэгүүд | — | 3 (1.00%) | 4 (1.33%) |
| Хоолны дуршил буурах | 3 (1.00%) | 4 (1.33%) | |
| Амьсгалын тогтолцооны эмгэгүүд | — | 6 (2.00%) | 3 (1.00%) |
| Ханиалгах | 6 (2.00%) | 3 (1.00%) | |
| Арьс ба арьсан доорх эдийн эмгэгүүд | — | 3 (1.00%) | 1 (0.33%) |
| Арьсны тууралт | 3 (1.00%) | 1 (0.33%) | |
| Чонон хөрвөс (уртикари) | 1 (0.33%) | 0 |
Мөн 2020 онд Энэтхэгийн Зүүн Дели дэх гуравдугаар шатлалын эмнэлэгт хийсэн судалгаагаар улаанбурхан–улаануудын (MR) вакцин тариулсны дараах гаж нөлөөг үнэлжээ. Судалгаанд нийт 278 хүүхэд хамрагдсанаас 42 хүүхдэд ямар нэгэн сөрөг нөлөө илэрчээ. Үүнээс 39 тохиолдол нь вакцин хийлгэснээс хойших эхний 7 хоногт, 3 тохиолдол нь дараагийн 21 хоногт бүртгэгджээ. Илэрсэн сөрөг нөлөөнүүдийн дийлэнх нь халууралт, дээд амьсгалын замын халдвар, тарьсан хэсгийн хавдалт болон арьсны тууралт байжээ. Арван нэгэн хүүхдэд нэгээс олон гаж нөлөө илэрсэн бөгөөд хамгийн түгээмэл нь халууралт болон тарьсан хэсгийн хавдалт, халууралт ба дээд амьсгалын замын халдвар байжээ. AEFI-ийн ангиллаар бүх гаж нөлөө нь хөнгөн шинжтэй байсан ба ноцтой буюу хүнд хэлбэрийн сөрөг нөлөө бүртгэгдээгүйг тус судалгаанд онцолжээ.
Халдварт өвчин судлалын үндэсний төвийн Дархлаажуулалтын албанд товлол вакцинтай холбоотой саажилтын тохиолдол бүртгэгдээгүй
Дархлаажуулалтын дараа хүний эрүүл мэндэд учирсан тогтвортой, эсхүл ноцтой хямралыг Дархлаажуулалтын дараах урвал хүндрэл буюу ДДУХ гэдэг байна.
“Тарилгын дараахь хүндрэлийн жагсаалтыг эрүүл мэндийн асуудал эрхэлсэн төрийн захиргааны төв байгууллага батална” гэж Дархлаажуулалтын тухай хуулийн 20.1-д заасан байдаг. Мөн Дархлаажуулалтын дараах урвал, хүндрэлийг (ДДУХ) бүртгэх, мэдээлэх, тандах үйл ажиллагаа нь Эрүүл мэндийн сайдын 2012 оны А/217 болон 2016 оны А/278 тоот тушаалын дагуу зохион байгуулагддаг. Энэхүү журмын 2.4-д зааснаар, Эх, хүүхдийн эрүүл мэндийн үндэсний төв, Клиникийн хоёрдугаар эмнэлгийн халдвар судлагч эмч, мөн хувийн хэвшлийн эрүүл мэндийн байгууллагын эмч нар нь дархлаажуулалтын дараах урвал, хүндрэл илэрсэн тохиолдолд Халдварт өвчин судлалын үндэсний төвийн Дархлаажуулалтын албанд хариуцсан мэргэжилтэнд утсаар болон цахимаар мэдээлнэ“ гэж заасан байна.
Бид товлол вакцинтай холбоотой саажилтын тохиолдол бүртгэгдсэн эсэх талаар Халдварт өвчин судлалын үндэсний төвийн Дархлаажуулалтын албанаас тодруулахад, уг төрлийн тохиолдол бүртгэгдээгүй гэж мэдээлсэн юм.
