2025 оны 06 дугаар сарын 20-нд Төмөрбаатарын Бат-Эрдэнэ (архивлагдсан хувилбар) гэх нэртэй Facebook хаяг Иран-Израилын зөрчил, мөргөлдөөнтэй холбогдуулан Иранд олон нийтийн жагсаал болж байгаа гэх бичлэгийг түгээжээ. Бичлэгт олон хүн гудамжаар жагсаж байгаа харагдах ба бичлэгийн нүүр хэсэгт “Иранчууд Израйльтай үзнээ л гэж байна. Ойрх Дорнодод байдал хүндэрвэл цөмдөө тулах байх…” хэмээн тайлбар тэмдэглэгээг тамгалжээ.
Зургаадугаар сарын 24-ний байдлаар тус бичлэг нь 4,300 орчим лайк, 480 гаруй коммент авч 452 удаа цааш түгээгдэн өндөр үзэлт, хандалт аваад байна.
Бид бичлэгийн эх сурвалжийг хайн энэхүү бичлэг нь Иракт өнгөрсөн гуравдугаар сард болсон үйл явдал болохыг баримт шалгалтаар сурвалжлан илрүүлсэн.
FACTCHECK: Бид дараах байдлаар баримт шалгалт хийлээ.
Бичлэгийн хэсгийг Google хайлтын системд зургаар хайхад Гүржийн Myth Detector баримт шалгах байгууллагын нийтлэл болон ижил бичлэгийг сошиал медиад түгээсэн байсныг илрүүлсэн.
Хайлтын илэрцээс Instagram дахь бичлэгийн пост руу нэвтрэхэд бичлэгийн эх сурвалжаар @JF_AM_20 гэсэн хаягийг дурдсан байсан ба бид тус хаягт ижил бичлэг 2025 оны 03 дугаар сарын 23-нд нийтлэгдэж байсныг тогтоосон. Бичлэгт Иракийн тугийг тамгалан коммент хэсэгт хэрэглэгчид тус улсын Самава хотод болсон үйл явдал хэмээн тэмдэглэсэн бөгөөд бидний шалгасан бичлэгтэй ижил байгааг харж болно.
Энэхүү жагсаал нь эсэргүүцлийн жагсаал бус харин гуравдугаар сарын 22-нд Имам Али гэх Исламын шашны Шийт урсгалын анхны удирдагчдын амиа зольсон явдлыг (martyrdom) тэмдэглэн өнгөрүүлж байгаа явдал аж. Тэмдэглэлт ойг тус хотын Facebook хуудас гуравдугаар сарын 22-нд мэдээлж байсан ба үйл явдлын өөр өнцгөөс авсан бичлэгийг үзэх боломжтой болохыг Myth Detector мэдээлж байжээ
Баримт шалгалтын эх сурвалжаас дүгнэвэл дээрх бичлэг нь энэ сард Иранд болж өнгөрсөн үйл явдал биш өнгөрсөн гуравдугаар сард Иракт шашны тэмдэглэлт өдрийн жагсаал, цуглаан байжээ.
Иран-Израилын зөрчил, мөргөлдөөнтэй холбоотой бидний хийсэн баримт шалгалтуудыг үргэлжлүүлэн линкээр нэвтрэн хүлээн аваарай.
