2025 оны зургаадугаар сарын 8-ны өдөр Дори shop нэртэй хуудаснаас “Хүйтэн уух зүйл бэлдэх машиныг 29900 төгрөгөөр аваарай” гэсэн агуулгатай бичлэг нийтэлжээ. Уг пост 145 реакц, 81 сэтгэгдэл авч, 59 удаа цааш түгээгджээ.
FACTCHECK: Бид дараах байдлаар баримт шалгалт хийлээ
Уг мэдээлэлд үзүүлж буй машиныг Google Lens хэрэглүүрээр хайхад Alibaba.com олон улсын худалдааны сайтад 900-980 доллар буюу гурван сая гаруй төгрөгөөр худалдаалж байна. Үүнийг 29,900 төгрөгөөр борлуулна гэдэг нь бодит үнийн дүнгээс хэт хол зөрүүтэй байна.
Дээрх мэдээллийг шалгахын тулд анхан шатны баримт шалгах алхмын дагуу хаягийг нягталлаа. Хуудасны ил тод байдлаас нь харахад Дори shop нь 2024 оны 12 дугаар сард нээгдсэн. Маш хямд үнэтэй бараа бүтээгдэхүүний талаар богино бичлэг нийтэлж, түгээдэг хуудас байна.
Тухайн хаягаас түгээсэн мэдээллүүд нь холбогдох дугаар, хаяг байршил, бүтээгдэхүүний талаарх дэлгэрэнгүй танилцуулга, захиалгын заавар, баталгаажуулалт зэрэг нэмэлт тайлбаргүй. Зарим бүтээгдэхүүн дээр үнийн мэдээлэл ч тэмдэглэхгүйгээр зөвхөн хаягийг дагаж, хуваалцахыг л уриалсан байна. Энэ нь худалдаа хийж, бүтээгдэхүүн борлуулахаас илүүтэйгээр хандалтаа өсгөхөөр зорьж буйн илрэл юм.
Хэт хямд үнэтэй бараа танилцуулж, сурталчлах нь хандалтаа өсгөх зорилгоор мэдээлэл түгээдэг хаягуудын ашигладаг түгээмэл аргуудын нэг юм. Мөн хүмүүсийн анхаарал татаж, сэтгэл хөдөлгөм мэдээлэл нийтлэх, ашиг хонжоо амлах, бэлэг, мөнгө тараах зэрэг хуурамч мэдээллийг түгээх нь элбэг. Ингэхдээ лайк дарж, сэтгэгдэл үлдээж, цааш түгээх гэсэн хялбар үйлдэлд уриалан олны анхаарлыг татаж хандалтаа нэмэгдүүлдэг.
Шалгаж буй мэдээллийг түгээсэн Дори shop гэх хуудас нь бэлэг тараахыг амласан пост түгээж байсныг өмнө нь бид шалгаж байсныг эндээс уншаарай
Хуудас хөтөлж, хандалтаа өсгөх нь хэвийн үзэгдэл ч зарим тохиолдолд энэ төрлийн хаягуудаар дамжуулан улс төрийн суртал ухуулга, хуурамч мэдээлэл зэрэг олон нийтийн санаа бодолд нөлөөлж, төөрөгдүүлэх зорилготой мэдээллүүдийг түгээдэг. Түүнчлэн энэ төрлийн хуурамч мэдээллээр дамжуулан санхүүгийн залилан үйлдэх нь ч бий. Иймд илт хуурамч мэдээлэл түгээж, хандалтаа өсгөхөөр зорьж буй хаягийг дагаж, хуваалцахаасаа өмнө хуудасны мэдээллийг шалгаж хэвшээрэй.
Дүгнээд хэлэхэд, хэт хямд бараа бүтээгдэхүүний мэдээлэл түгээж, ханалтаа өсгөж буй хуудаснууд нь хожим өөр зорилготой мэдээлэл түгээж, олон нийтийг төөрөгдүүлэх магадлалтай тул илт хуурамч, баталгаагүй мэдээлэл нийтэлж буй хаягуудад хандахгүй байх нь зүйтэй.
