2025 оны 06 дугаар сарын 18-нд Olloo.mn-Өдөр бүр дэлхий даяар гэх нэртэй Facebook пэйж “Иран охид хижабаа тайлж, сургуулиа эзлэн авч, “Дарангуйлагч ба Исламын дэглэмд үхэл” хэмээн хашхирч байна” гэх гарчигтай бичлэг түгээжээ. Уг бичлэгийг 712 реакц, 113 сэтгэгдэл, 203 шэйрээр идэвхжүүлж, 200 гаруй мянга үзжээ.
FACTCHECK: Бид дараах байдлаар баримт шалгалт хийлээ
Бид уг бичлэгийг интернэт орчинд хайж үзэхэд 2022 оны 10 дугаар сарын 05-нд Ираны оюутан охид засгийн газрынхаа эсрэг жагсаж буй үеийнх байжээ.
2022 оны 09 дүгээр сарын 13-нд 22 настай Mahsa Amini гэх эмэгтэйг hijab (толгойн ороолт) өмсөх хуулийг зөрчсөн хэмээн баривчилжээ. Тэрээр гэрчүүдийн мэдүүлгээр цагдаагийн машин дотор байхдаа эрүү шүүлтэд орж, зодуулан толгойндоо хүнд гэмтэл авсан гэжээ. Удалгүй эмнэлэгт хүргэгдэн 3 хоногийн дараа буюу 2022 оны 09 дүгээр сарын 16-нд нас барсан. Үүнээс үүдэн Иран улс даяар эмэгтэйчүүд hijab-аа тайлан, уг хуулийг эсэргүүцэн жагсаж эхэлжээ. Тухайн үеийн жагсаалын бичлэгийг энд, энд болон эндээс үзээрэй.
Дүгнээд хэлбэл, 2022 оны 09 дүгээр сард цагдаа нарын харгислалд нас барсан иран охины төлөө жагссан үеийн бичлэгийг одоо болж буй Иран, Израилын мөргөлдөөнтэй холбож түгээн, төөрөгдүүлжээ.
