Иран, Израилын пуужингийн дайралттай холбоотой төөрөгдүүлсэн мэдээлэл түгээж байна

#FactCheckedByMFCC | Шалгасан кэйсийн дугаар 1481

Шалгасан: MFCC
2025-06-18

Checked by: MFCC

Ерөнхий агуулга

“Иран хэдхэн цагийн өмнө харвасан пуужингийн харвалт” гэсэн гарчигтай бичлэг болон “Дууны хурднаас 12-13 дахин хурдан Hypersonic супер пуужингаа бүгдийг нь ашиглахаар шийдсэн байна” гэсэн агуулгатай бичлэг түгээжээ.

Баримт шалгалтын үр дүн

2024 оны 10 дугаар сарын 02-нд болсон үйл явдлыг “хэдхэн цагийн өмнө” болсон мэт төөрөгдүүлжээ. Мөн хиймэл оюун ухаанаар бүтээсэн бичлэгт төөрөгдүүлсэн агуулга нэмж мэдээлжээ.

Энэхүү мэдээлэлд Мета компанийн Хөндлөнгийн баримт шалгах хөтөлбөрийн хүрээнд тэмдэглэгээ зүүж анхааруулсан болно. (Дэлгэрэнгүйг энд болон эндээс уншина уу.)

Шалгасан мэдээлэл №1 Хуучирсан мэдээг одоо болж буй мэт түгээж байна

2025 оны 06 дугаар сарын 17-нд Группын Админ нэртэй Facebook хэрэглэгч “Иран хэдхэн цагийн өмнө харвасан пуужингийн харвалт” гэсэн гарчигтай бичлэг түгээжээ. Уг бичлэгийг 206 реакц, 14 сэтгэгдлээр идэвхжүүлж, 44 мянга гаруй удаа үзжээ.

FACTCHECK: Бид дараах байдлаар баримт шалгалт хийлээ

Дээрх түгээсэн бичлэгийг 2024 оны 10 дугаар сарын 02-нд дараах олон улсын мэдээллийн сувгууд албан ёсны сошиал хаягуудаараа түгээж байсныг доор жагсаалаа.

DD India (YouTube): “Ираны пуужин Негевийн цөлд орших Неватимийн агаарын баазыг онилж байна“
All India Radio News (Facebook): “Баруун Азийн мөргөлдөөн, Иран Израил руу пуужин харважээ“
TRT World (YouTube): “Израилын агаарын бааз Неватим Ираны пуужинд өртлөө“

Эдгээрээс үзвэл уг бичлэг нь саяхных биш, 2024 оны 10 дугаар сард болсон үйл явдлыг харуулжээ.

Шалгасан мэдээлэл №2 Хиймэл оюун ухаанаар бүтээсэн бичлэг ашиглан мэдээлжээ

2025 оны 06 дугаар сарын 17-нд Группын Админ нэртэй Facebook хэрэглэгч “Дууны хурднаас 12-13 дахин хурдан Hypersonic супер пуужингаа бүгдийг нь ашиглахаар шийдсэн байна” гэсэн агуулгатай бичлэг түгээжээ. Уг бичлэгийг 681 реакц, 23 сэтгэгдлээр идэвхжүүлж, 72 удаа цааш хуваалцжээ.

FACTCHECK: Бид дараах байдлаар баримт шалгалт хийлээ

Hive Moderation нь дуу, зураг, бичлэгийг хиймэл оюун ухаанаар бүтээсэн эсэхийг шалгаж, үнэлгээ өгдөг цахим хэрэглүүр юм. Бид энэхүү хэрэглүүрийг ашиглан түгээсэн бичлэгийг шалгахад хиймэл оюун ухаанаар ашигласан байх магадлал 96 хувьтай гэсэн үр дүн гарлаа. Мөн Flux гэх өгөгдсөн текст, зургийг хиймэл оюун ухааны тусламжтайгаар бичлэг болгодог модель ашиглажээ.

Иймд бодит бус, хиймэл оюун ухаанаар бүтсэн зураг, бичлэг хавсаргасан мэдээлэлд хэрсүү хандахыг зөвлөе.

Цахим орчинд цаг үеийн, шуугиан тарьж буй мэдээллийг гуйвуулах, төөрөгдүүлэх зэргээр хандалт авах эсхүл нэг талыг барьж мэдээлэн, ташаа ойлголт төрүүлэх явдал түгээмэл байдаг тул та аливаа мэдээллийг албан ёсны, баттай эх сурвалжтай мэдээллийн хэрэгслээс авч байгаарай.

Аливаа мэдээллийг хуваалцахаасаа өмнө #ЭхлээдБод #Think1st

Та бүхэн манай төвийн баримт нягталсан мэдээтэй холбоотой аливаа санал хүсэлт, залруулга хийлгэх болон бусад санал гомдлоо редакцын hello@mfcc.mn имэйл хаягаар ирүүлнэ үү.

ЭХ СУРВАЛЖ, ХОЛБООТОЙ НИЙТЛЭЛҮҮД

Шалгасан мэдээлэл 1 (архивласан хувилбар)

Шалгасан мэдээлэл 2 (архивласан хувилбар)

Эх сурвалжууд

India Today-ээс гаргасан баримт шалгалт

DD India (YouTube): “Ираны пуужин Негевийн цөлд орших Неватимийн агаарын баазыг онилж байна”

All India Radio News (Facebook): “Баруун Азийн мөргөлдөөн, Иран Израил руу пуужин харважээ”

TRT World (YouTube): “Израилын агаарын бааз Неватим Ираны пуужинд өртлөө”

Hive Moderation – Дуу, зураг, бичлэгийг хиймэл оюун ухаанаар бүтээсэн эсэхийг шалгадаг хэрэглүүр

Ерөнхий агуулга

Хуваалцах

Бид Олон Улсын Баримт Шалгагчдын Сүлжээ (International Fact-Checking Network)-ний ёс зүйн кодын дагуу аливаа мэдээллийг баримтаар баталгаажуулан шалгадаг. Баримтаар шалгасан мэдээллээ #ҮНЭН, #ХУДАЛ, #ТӨӨРӨГДҮҮЛСЭН, #БҮРЭН БУС, #ЭВЛҮҮЛЭГ, #ЕГӨӨДӨЛ гэсэн зургаан төрлөөр ангилж, олон нийтэд үнэн бодит мэдээлэл түгээн ажиллаж байна.