Ерөнхийлөгч У.Хүрэлсүх "Үндсэн хуульд өөрчлөлт оруулахгүй, парламентын засаглал бол ард түмний үнэт зүйл" гэж мэдэгдсэн

Ерөнхийлөгч У.Хүрэлсүх “Үндсэн хуульд өөрчлөлт оруулахгүй, парламентын засаглал бол ард түмний үнэт зүйл” гэж мэдэгдсэн

#FactCheckedByMFCC | Шалгасан кэйсийн дугаар 1451

Шалгасан: MFCC
2025-05-30

Checked by: MFCC

Ерөнхий агуулга

Сүүлийн үед цахим орчинд “…Засгийн газар огцорвол Монголын ардчилал үгүй болж, Монгол улс Ерөнхийлөгчийн засаглал руу шилжинэ. Ерөнхийлөгчийн засаглал тогтчихвол манай улс Хойд Солонгос шиг даржин, ертөнцөөс тусгаарлагдсан улс болж хувирна…”, “2028 онд МАН л биш бол хэн ч яахав гэдэг сонгууль болох нь гарцаагүй боллоо”, “Ерөнхийлөгчийн засаглалыг бодох цаг нь болсон” зэрэг мэдээлэл түгжээ.

Баримт шалгалтын үр дүн

2025 оны 5-р сарын 29-нд Ерөнхийлөгч У.Хүрэлсүх албан ёсны байр сууриа илэрхийлж, Үндсэн хуульд нэмэлт өөрчлөлт оруулах болон Ерөнхийлөгчийн засаглалд шилжихийг дэмжихгүй, парламентын засаглалыг бэхжүүлэх нь зүйтэй гэж мэдэгдсэн

Энэхүү мэдээлэлд Мета компанийн Хөндлөнгийн баримт шалгах хөтөлбөрийн хүрээнд тэмдэглэгээ зүүж анхааруулсан болно. (Дэлгэрэнгүйг энд болон эндээс уншина уу.)

FACTCHECK: Бид дараах байдлаар баримт шалгалт хийлээ

Энэ асуудлаар Монгол Улсын Ерөнхийлөгч У. Хүрэлсүх 2025 оны тавдугаар сарын 29-нд өөрийн албан ёсны цахим хуудастаа “Сүүлийн үед Монгол Улсын Үндсэн хуульд нэмэлт өөрчлөлт оруулах болон Ерөнхийлөгчийн засаглалтай болох эсэх асуудал улс төрийн хүрээнд олон нийтийн дунд яригдах болсонтой холбогдуулан Монгол Улсын Ерөнхийлөгчийн хувьд өөрийн байр суурийг тодорхой илэрхийлье. Миний бие Монгол Улсын Ерөнхийлөгчөөр ажиллаж байх хугацаандаа Монгол Улсын Үндсэн хуульд нэмэлт өөрчлөлт оруулах асуудлыг дэмжихгүй гэдгээ урд өмнө илэрхийлж байсан. Одоо ч энэ байр суурь огт өөрчлөгдөөгүй гэдгийг хариуцлагатайгаар мэдэгдье. Монгол Улс бол Үндсэн хуульд заасны дагуу парламентын засаглалтай орон. Энэ бол Монголын ард түмний сонгосон сонголт, үнэт зүйл юм. Монгол Улсын тусгаар тогтнол, үндэсний аюулгүй байдал, ард түмний эв нэгдлийг хангах язгуур эрх ашгийн тусын тулд цаашид ч Монгол Улс парламентын засаглалаа улам бэхжүүлж, ардчилсан засаглалыг төгөлдөржүүлэх ёстой гэж төрийн тэргүүний хувьд үздэг. Миний бие Монгол Улсын Ерөнхий сайдаар ажиллаж байхдаа ч энэхүү байр сууриа олон нийтэд нээлттэй ил тод илэрхийлж байсан гэдгийг сануулъя” гэжээ.

Мөн тавдугаар сарын 18-нд Ерөнхийлөгчийн хэвлэлийн төлөөлөгч Ө.Золбаяр өөрийн цахим хуудсаар дамжуулан “Монгол Улсын Ерөнхийлөгч У.Хүрэлсүх Ерөнхийлөгчөөр дахин сонгогдохын тулд Үндсэн хуульд өөрчлөлт оруулахаар зүтгэж байна гэх ташаа мэдээлэл, улс төржилт олон нийтийн сүлжээнд тархаж байна. Үүнтэй холбогдуулан Монгол Улсын Ерөнхийлөгчийн 2024 оны 11 дүгээр сарын 25-нд илэрхийлсэн байр суурийг дахин сануулж байна. Нэмж тодотгоход, Монгол Улсын Ерөнхийлөгчийн байр суурь хэвээрээ байгаа болно” гэж мэдэгджээ.

Аливаа мэдээллийг хуваалцахаасаа өмнө #ЭхлээдБод #Think1st

Та бүхэн манай төвийн баримт нягталсан мэдээтэй холбоотой аливаа санал хүсэлт, залруулга хийлгэх болон бусад санал гомдлоо редакцын hello@mfcc.mn имэйл хаягаар ирүүлнэ үү.

ЭХ СУРВАЛЖ, ХОЛБООТОЙ НИЙТЛЭЛҮҮД

Шалгасан мэдээлэл (архивласан хувилбар)

Эх сурвалж

Монгол Улсын Ерөнхийлөгчийн мэдэгдэл

Ерөнхийлөгчийн хэвлэлийн төлөөлөгчийн мэдэгдэл

Ерөнхий агуулга

Хуваалцах

Бид Олон Улсын Баримт Шалгагчдын Сүлжээ (International Fact-Checking Network)-ний ёс зүйн кодын дагуу аливаа мэдээллийг баримтаар баталгаажуулан шалгадаг. Баримтаар шалгасан мэдээллээ #ҮНЭН, #ХУДАЛ, #ТӨӨРӨГДҮҮЛСЭН, #БҮРЭН БУС, #ЭВЛҮҮЛЭГ, #ЕГӨӨДӨЛ гэсэн зургаан төрлөөр ангилж, олон нийтэд үнэн бодит мэдээлэл түгээн ажиллаж байна.