2025 оны гуравдугаар сарын 25-ны өдөр Мон Хү гэх хаягаас “Та 5$ зарцуулснаар хязгааргүй ашиг орлого олох боломж байна. Найдвартай, баталгаатай. Хэрэв та ойлгохгүй байвал би танд заагаад өгнө маш амархан” гэсэн тайлбартай пост нийтэлжээ. Уг пост 100 гаруй удаа цааш түгээгджээ.
FACTCHECK: Бид дараах байдлаар баримт шалгалт хийлээ
Уг мэдээллийг нягтлахын тулд хаягийг шалгах болон зургаар хайх аргыг ашиглалаа. Шалгаж буй мэдээлэлд хавсаргасан зургийг Google Lens хайлтын системээр шалгахад Tether (USDT) гэх стэйблкойн (stablecoin) төрөлд хамаарах криптовалютын мэдээлэл байна. Уг стэйблкойныг байнгын тогтвортой үнэтэй, найдвартай мэтээр сурталчилдаг. Гэвч тус койн нь банк шиг албан ёсны хамгаалалт, даатгалын системгүй, тогтвортой байдлын баталгаагүй зэрэг нь хэрэглэгчид санхүүгийн эрсдэл учруулж болзошгүй.
Уг койныг нээсэн компани 2021 онд Нью-Йоркийн шүүхээр шалгагдаж “Санхүүгийн ил тод байдлын мэдээлэл хангалтгүй, нөөц хөрөнгийн мэдээлэлгүй” гэх шалтгаанаар торгуулж байсан. Энэхүү хууль эрх зүй, санхүүгийн маргаантай байдал нь тухайн койны эрсдэлтэй нөхцөлийн илрэл юм.
Харин дээрх мэдээллийг түгээсэн хаягийг шалгахад, тодорхой мэдээлэлгүй, хаалттай байна. Шалгаж буй мэдээллийг өөрийн хаягаар олон төрлийн бүлгэм рүү хуваалцаж, зөвхөн чатаар харилцахыг хүссэн нь залилангийн шинжтэй үйлдэл юм. Энэ төрлийн хуурамч мэдээлэл нь амар аргаар их хэмжээний мөнгө олох боломжтой, өндөр ашигтай гэх мэт хэтрүүлсэн өнгө аястай байдаг. Мөн холбогдох дугаар, нэмэлт тайлбар, нээлттэй байдал гэх мэт тодорхой мэдээлэлгүй байгаа нь тухайн хаягийн баталгаагүйг харуулж байна.
Иймд баталгаагүй хаягаас түгээсэн амархан аргаар, хурдан хугацаанд их хэмжээний ашиг олох боломж гэх мэт мэдээлэлд хянуур хандаж, өөрийгөө болон бусдыг санхүүгийн эрсдэлээс хамгаалах хэрсүү нэгэн байгаарай.
