2025 оны 04 дүгээр сарын 09-нд Zuv Khovd Mn нэртэй хуудаснаас “Энэ тахианы мах бөөн хор юм биш үү?” гэх тексттэй дэгдээхэй угжиж буй богино хэмжээний бичлэг нийтэлжээ. Тус бичлэгийг нийт 1,600 гаруй реакц, 246 сэтгэгдлээр идэвхжүүлж, 1,400 гаруй удаа цааш түгээжээ.
FACTCHECK: Бид дараах байдлаар баримт шалгалт хийлээ
Түгээсэн бичлэгийн хэсгийг Google Lens хайлтын системээр хайхад бичлэгийн эх хувилбарыг “Medul’s Pigeon” буюу Медулийн тагтаа нэртэй хуудаст 2025 оны 03 дугаар сарын 28-нд нийтэлжээ. Тус бичлэгийг нийтлэхдээ “Тагтааны дэгдээхэй” гэх тайлбартай оруулжээ. Уг хуудсыг нягтлахад тагтааны тухай бичлэг болон шалгасан бичлэгтэй ижил төрлийн тагтаа хооллож буй бичлэг хэд хэдийг нийтэлсэн байна. (энд, энд бас энд)
Medul’s Pigeon хуудас танилцуулга хэсэгтээ arpcd.org гэх сайтыг байршуулжээ. Тус сайт нь Бангладешийн Дака хотын тагтааны уралдааны спорт клубын сайт болохыг доорх зурагт харууллаа.
Клубын танилцуулга хэсэгт “2018 онд үүсгэн байгуулагдсан бөгөөд жил бүрийн гишүүдийн тусламжтайгаар Бангладеш улсад тагтааны уралдаан зохион байгуулдаг” тухай дэлгэрэнгүй тайлбарлажээ. Мөн сайтын гишүүн хэсгээс Medul гэх хүн байгаа эсэхийг шалгахад “MD. Salauddin Medul” гэх гишүүний мэдээлэл Medul’s Pigeon хуудасны танилцуулга хэсэгт оруулсан мэдээлэлтэй таарч байна. (Нэмэлт мэдээлэл: Тагтааны уралдаан нь 1818 онд анх удаа Бельги улсад болсон ба 100 миль (160 км) холын зайд уралдаж байжээ.)
Бангладеш улсад тагтаа уралдуулдаг спорт клубын гишүүн, тагтааны аж ахуй эрхэлдэг хүний пэйжид оруулсан тагтааны дэгдээхэй хооллож буй бичлэгийг “тахианы мах хортой юм биш үү” гэх төөрөгдүүлсэн тайлбартай дахин түгээжээ.
