2025 оны 03 дугаар сарын 29-ний өдөр И.Цэрэнхүү нэртэй Facebook хэрэглэгч “Японы ЗГ 2 тэрбум $-ын ковидын вакцин устгалд оруулах шийдвэр гаргалаа вакцин хийлгэсэн хүнээс цусны донор авахыг хориглов” гэх агуулгатай пост түгээжээ. Тус постыг нэг мянга гаруй реакц, 221 сэтгэгдлээр идэвхжүүлж, 796 удаа цааш түгээжээ.
FACTCHECK: Бид дараах байдлаар баримт шалгалт хийлээ
Японы засгийн газар хугацаа нь дуусаж буй вакцины тунг устгалд оруулсан
Японы топ хэвлэл мэдээллийн нэг болох The Mainichi Shimbun-ийн (Өдөр тутмын сонин) вэбсайтад 2023 оны 03 дугаар сарын 18-ны өдөр “1.6 тэрбум ам.долларын үнэ өртөг бүхий 77.8 сая Ковидын вакциныг устгалд оруулжээ” гэх гарчигтай мэдээ гарчээ.
Уг мэдээнд “Япон улс нийт гэрээгээр худалдан авсан вакцины 9 хувийг буюу хугацаа нь дуусаж буй тунг устгалд оруулсан бөгөөд нөөцөд үлдсэн вакцины хугацаа дуусахын хэрээр устгал ажил үргэлжлэх төлөвтэй байна” гэжээ. Mainichi уг тоог Японы Эрүүл мэндийн яамны олон нийтэд нээлттэй мэдээллийг судалж, тус улсын томоохон орон нутгийн захиргаануудад асуулга явуулсны үндсэн дээр гаргажээ.
Японы засгийн газар COVID-19 вакцины нэг тунгийн худалдан авах үнийг албан ёсоор зарлаагүй тул хаягдсан тунгуудын нийт үнийг нарийн тооцоолох боломжгүй. Гэсэн хэдий ч Сангийн яам вакцин худалдан авах 2.4 их наяд иений (ойролцоогоор 18.23 тэрбум ам.доллар) төсвийг 882 сая тун вакцин худалдан авна гэсэн мэдээлэлд тулгуурлан нэг тунгийн үнэ 2,725 иен (ойролцоогоор 20.70 ам.доллар) гэж гаргажээ.
Энэ нэгж үнэд үндэслэн, Mainichi-ийн тооцоолсноор устгалд оруулсан вакцинуудын нийт өртөг 212 тэрбум иен буюу ойролцоогоор 1.6 тэрбум ам.доллар болсон байна. Эрүүл мэндийн яамны ахлах албан тушаалтан Mainichi-д “Нэгж үнийг тооцох энэ арга нь үндэслэлтэй, нэг их зөрөхгүй байж болох юм” хэмээн мэдэгдэж, уг тооцоолол бодит үнэнд ойрхон гэдгийг илэрхийлжээ.
Японы засгийн газар вакцин хийлгэсэн хүнээс цусны донор авахыг хориглосон гэдэг нь худал
2024 оны 04 дүгээр сарын 04-ний өдөр Францын AFP (Agence France-Presse) Тайланд, Өмнөд Солонгос, Их Британи зэрэг улсуудаар түгээд байсан “Япон улс вакцин хийлгэсэн хүмүүсийг цусны донор болохыг хориглосон” гэх постод баримт шалгалт хийж, худал болохыг тогтоожээ. Японы Улаан Загалмайн албан ёсны вэбсайтад вакцин хийлгэсэн хүмүүс цус хандивлах хэвээр байгааг эндээс харж болно.
Дүгнээд хэлбэл, Японд хугацаа нь дуусах гэж буй ковидын вакциныг устгалд оруулсныг төөрөгдүүлсэн утгаар түгээж, мөн Япон улс ковидын вакцин хийлгэсэн хүмүүс цусаа хандивлахыг хориглосон гэх худал мэдээлэл түгээжээ.
