2025 оны 03 дугаар сарын 27 нд Altantsog Bor нэртэй хаягаас “Ням-осорын Учрал болон тэр Өөрсдийгөө эрдэмтэн доктор гээд өргөмжлөөд байгаа их мэдэгч нарт зориулж хэлмээр байна мэдэхгүй зүйлээрээ оролдоно гэдэг ийм л аюултай шүү!!! Уранаа болиорой!” гэх тайлбар бүхий ажилчид ухаан алдаж унаж буйг дүрсэлсэн богино хэмжээний бичлэг нийтэлжээ. Бичлэгт уранаас болж газар дээрээ үхэж байна гэх агуулгыг дуу оруулан ярьжээ. Тус бичлэгийг нийт 3,600 гаруй реакцаар идэвхжүүлж, 14 мянга гаруй удаа цааш түгээжээ.
FACTCHECK: Бид дараах байдлаар баримт шалгалт хийлээ
Түгээсэн бичлэгийн хэсгийг Google Lens хайлтын системээр хайхад 2021 онд болсон үйл явдлын мэдээллүүд гарч ирлээ. Тодруулбал, 2021 оны 09 дүгээр сарын 21 -нд Туркийн Ensonhaber мэдээллийн сайтад “Истанбулийн Тузла дүүрэгт усан онгоцны үйлдвэрт ажиллаж байсан 8 хүн хий алдагдсанаас болж хордсон ба туслахаар очсон ажилчдын нэг нь цахилгаанд цохиулж гэмтсэн агшин бичлэгт буужээ” хэмээн үйл явдлыг тайлбарлажээ.
Туркийн Sabah, MEHR News Agency, Birgün Gazetesi, Sendika bülteni зэрэг мэдээллийн сайтад 2021 болсон уг үйл явдлын тухай мэдээлжээ. 2021 оны 09 дүгээр сарын 14-нд Туркийн Истанбулд хотын, Тузла дүүрэгт байрлах “Kuzey Star” усан онгоцны үйлдвэрийн усан сан гэж нэрлэгдэх хэсэгт хоёр ажилтан нүүрсхүчлийн хийнд хордон унасан. Аврахаар буусан 6 хүн мөн хордож, хамгаалалтын хувцасгүй байсан нэг хүн цахилгаанд цохиулан бэртэж гэмтсэн нь бичлэгт буусан байна.
Мөн CNN TÜRK Youtube сувагт 2021 оны 09 дүгээр сарын 23-нд үйлдвэрт осол болсон тухай мэдээ оруулсан ба түгээсэн бичлэгийг, болсон үйл явдлыг тайлбарлажээ.
2021 онд Турк Улсад усан онгоцны үйлдвэр дээр болсон үйл явдлын бичлэгийг ураны үйлдвэрт болсон мэтээр түгээж, төөрөгдүүлжээ.
