2025 оны 03 дугаар сарын 18-нд Ноцтой Но-той мэдээлэл (архивласан хувилбар) нэртэй хуудаснаас “Өнөөдөр Налайхын замд гэнэ…хүмүүс ч эрт хаваршиж бн шүү…” гэх тайлбартай замын хашлага мөргөн зогссон машины дэргэд эмэгтэйн бүжиглэж буй бичлэгийг нийтэлжээ. Тус бичлэгийг нийт 1,000 гаруй реакц, 164 сэтгэгдлээр идэвхжүүлж, 127 удаа цааш түгээжээ.
FACTCHECK: Бид дараах байдлаар баримт шалгалт хийлээ
Шалгасан бичлэгийн хэсгийг Google Lens хайлтын системээр хайхад Тайваний 74-р хурдны замд хашлага мөргөсөн эмэгтэйн тухай хэд хэдэн гадаад сайт мэдээлэл оруулсан нь илэрцээр гарч ирлээ. Тухайлбал, CTI News, Enn.tw, Itn News, TVBS News зэрэг Тайваний мэдээллийн сайтад “2024 оны 12 дугаар сарын 09-нд өглөөний 06:00 цагийн орчимд Тайчунг хотын иргэн Лэй овогтой 38 настай эмэгтэй Тайпин-Дали руу явах 74-р хурдны замд дээр замын тусгаарлах хэсгийг мөргөжээ” хэмээн мэдээлсэн. Мөн мэдээлэлд эмэгтэй хашлага мөргөсний дараа машинаас гаран бүжиглэж, цагдааг ирэхэд жимс идэж байсан тухай дурджээ.
TVBS NEWS мэдээллийн сайтын Youtube сувагт замын тусгаарлах хашлагыг мөргөсөн эмэгтэйн тухай мэдээ оруулсан ба тус бичлэгт замын хяналтын камер, иргэдийн авсан бичлэг, зураг зэргийг багтаажээ.
Дүрсний чанар муу, машины дугаар харагдахааргүй бичлэгийг “Налайхын замд” хэмээн төөрөгдүүлсэн тайлбартай оруулсан байна. Бичлэгт гарсан үйл явдал нь Тайваньд 2024 оны 12 дугаар сарын 09-нд болсон осол юм.
