2025 оны хоёрдугаар сарын 20-ны өдөр Sanjaasuren Oyun нэртэй хаягаас “Танд ямар нэгэн төлөвлөгөө бий юу? Төсөлдөө илүү сайн тусламж авахын тулд хүсэлтээ оновчтой болго. Энэ төсөл Монголын бүх өрхөд хамаатай. Энэ хүнд үед хүн амаа дэмжих зорилгоор өрх бүрд буцалтгүй тусламж. Таны хэрэгцээг илүү сайн хангахын тулд мессеж үлдээнэ үү!!” гэсэн тайлбартай пост нийтэлжээ.
FACTCHECK: Бид дараах байдлаар баримт шалгалт хийлээ
Уг мэдээллийг нягтлахын тулд анхан шатны баримт шалгах алхмын дагуу хаягийг нягтлах замаар шалгалаа. Тухайн хаягийг шалгахад буцалтгүй тусламж, эргэн төлөлтгүй санхүүжилт гэх нэрийдлээр мөнгө өгөх тухай агуулгатай постыг нийтэлсэн байна. Мөн олны танил хүмүүс, гаднын иргэн, их хэмжээний мөнгөн дэвсгэрт зэрэг зургийг хавсаргажээ. Тухайлбал, ‘‘Парис-2024’’ зуны олимпын мөнгөн медалийн эзэн, ОУХМ Б.Баасанхүүгийн зургийг нийтэлж, буцалтгүй тусламж авсан мэтээр тайлбарлан бичжээ.
Гэвч уг хавсаргасан зураг нь Б.Баасанхүү тамирчны гаргасан амжилтад баяр хүргэж, Скайтел Групп, ‘‘Скай Хайпермаркет ХХК’’ болон ‘‘Баттүшиг ба Цэлмүүн’’ сангаас урамшуулал олгосон үеийн зураг байна.
Дээрх мэдээллийг түгээж буй хэрэглэгчийн нэрээр хайлт хийхэд ижил зураг нэрээр “чатаар холбогдоод мөнгө аваарай” гэх агуулга бүхий мэдээллийг түгээдэг 10 орчим хаяг илэрлээ. (Энд, энд, энд, энд) Тэдгээр постын нийтлэг шинж нь холбоо барих дугаар, нэмэлт мэдээлэлгүй зөвхөн чатаар харьцахыг уриалсан байна. Бодит бизнес үйл ажиллагаа нь албан ёсны вэбсайт, хаяг, утасны дугаартай байдаг. Харин залилангийн шинжтэй постууд ихэвчлэн тодорхой бус холбоо барих мэдээлэлтэй, зөвхөн хувийн чатаар холбогдохыг шаардах нь элбэг.
“Шуурхай мөнгө олох”, “Бага мөнгөөр их ашиг хүртэх” гэх мэт хэт ашигтай санагдах амлалтууд нь ихэвчлэн залилангийн шинжтэй байдаг. Иймээс хурдан хугацаанд, их хэмжээний мөнгө олох агуулгыг холбогдох дугаар, түгээсэн эзэн тодорхойгүй хаягаас нийтэлсэн сэжигтэй постуудыг репорт хийж хэвшээрэй.
Хуурамч хаяг, залилангийн шинжтэй постуудын нийтлэг чанар:
- Өмнө нь ямар нэгэн бичлэг, пост оруулж байгаагүй эсвэл хэтэрхий бага мэдээлэлтэй
- Зөвхөн нэг төрлийн зурагтай (ихэвчлэн интернэтээс татсан байх нь элбэг)
- “Сугалаанд хожлоо”, “Шагналтай боллоо” гэх мэт амар аргаар, хурдан мөнгөтэй болох талаар нийтэлж, анхаарал татдаг
- Мөнгө, шагнал авахын тулд таны хувийн мэдээлэл эсвэл урьдчилгаа төлбөр шаарддаг
- Зөвхөн чатаар холбогдохыг шаарддаг, утасны дугаар, албан ёсны вэбсайтгүй
- Хувийн мэдээлэл, банкны, дансны дугаар зэргийг асуудаг
- Бодох хугацаа өгөхгүйгээр яаруулж, тэвдүүлдэг
- Үг, үсэг тэмдэгт, найруулгын алдаатай нийтлэлүүдийг түгээдэг
- Нийтлэлүүд нь бодит хүмүүсийнх шиг олон янзын биш, тогтсон нэг хэв маягтай гэх мэт шинжийг агуулдаг.
Дээрх шинжүүдийг харгалзан үзэж, сэжигтэй тохиолдолд тухайн хаягийг дагахаа болих, Facebook болон бусад холбогдох байгууллагад мэдээлэх хэрэгтэй. Аливаа үүсэж болох эрсдэлээс өөрийгөө болон бусдыг хамгаалах хэрсүү нэгэн байгаарай.
