2025 оны хоёрдугаар сарын 25-нд нисэх буудлаас алдсан ачааг хямдаар авч болох тухай зар бүхий постыг Чингис хаан олон улсын нисэх онгоцны буудал MN гэх хуудас түгээсэн (архивлагдсан хувилбар) байна. Постод олон тооны ачааны цүнхний зургийг харуулан “Алдагдсан ачаа 7230₮” гэсэн шар тэмдэглэгээг тавьжээ. Зарын постод тайлбарласнаар “Нисэх буудлын агуулахыг чөлөөлж‚ алдагдсан ачаагаа 7230₮‐өөр зарна․ Манай бүх чемодан янз бүрийн зүйл‚ электрон бараагаар дүүрэн байдаг․ Улсын хэмжээнд хүргэлттэй. Санал зөвхөн сарыг дуустал онлайнаар хүчинтэй. Зар дээрх товчлуур дээр дарж хуудас руу орж захиалгаа өгөөрэйǃ” хэмээн хямдаар хэн нэгний алдагдсан ачааг авч болох мэтээр зарласан байна.
Бид зарыг бодит эсэх талаар үргэлжлүүлэн эрэн сурвалжлахад энэ нь олон хэлээр өмнө нь түгж байсан онлайн залилан болохыг тогтоосон.
FACTCHECK: Бид дараах байдлаар баримт шалгалт хийлээ.
Постод ашигласан зургийг Google хайлтын системд хайхад 2023 онд олон улсын онгоцны буудлуудын нэрээр нээсэн хуурамч хаягууд ижил зорилгоор ашиглаж байжээ. Тодруулбал, Осло хотын нисэх буудал, Брюсселийн нисэх буудал гэх мэт хуурамч хаяг үүсгэн, хямд үнээр ачаа өгнө гэх зар түгээж байжээ.
Дээрх постуудад ижил зураг ашиглан үнэмшүүлэх зорилготой хуурамч хаягууд сэтгэгдэл үлдээснийг харж болно.
Энэ залилангийн талаар олон улсын баримт шалгах байгууллагууд хэдийн мэдээлсэн ба Грекийн Ellinika Hoaxes, Италийн Open зэрэг байгууллага энэ талаар мэдээлж байжээ.
Белгийн Bulletin вэбсайтын мэдээлснээр ижил агуулгатай залилан нь Кени улсаас гаралтай байж болохыг онлайн сурталчилгаанд ашигласан утасны дугаараар тогтоосон ба монгол хэл дээр нийтлэгдсэн хуурамч зард Вьетнам улсын утасны дугаарын кодтой байгааг харж болохоор байна.
Хямд ачаа зарна гэсэн хаяг нь Чингис хаан олон улсын нисэх буудлын албан ёсны Facebook хаяг биш бөгөөд тус нисэх буудлын албан ёсны CHINGGIS KHAAN INTERNATIONAL AIRPORT хуудас хоёрдугаар сарын 21-нд тус зарыг хуурамч болохыг мэдэгдсэн байна. Мэдэгдэлд анхааруулснаар “Доорх хаяг нь “Чингис хаан” Олон улсын нисэх буудлын нэрийг барьсан хуурамч хаяг бөгөөд иргэд та бүхэн сэрэмжтэй байж линк дээр дарахгүйгээр мэдээллийн үнэн зөв байдлыг нягталж, цахим орчны халдлагаас сэргийлэн, сонор сэрэмжтэй байна уу.” хэмээжээ.
Тус хуурамч хаяг нь дөрвөн пост Facebook-т идэвхжүүлэн сурталчилгаа явуулж байгаа ба бодит сурталчилгаа биш хуурамч хаягаас нийтэлсэн залилангийн зар болохыг анхаараарай.
Ийм төрлийн хуурамч зар нь хувийн мэдээлэл цуглуулах, аюултай програм хангамж суулгах зорилгоор линк даруулах зэрэг үйлдэл хийхэд хөтөлдөг байх боломжтой ба аливаа линкэд нэвтрэхээс өмнө хаягийн бодит байдлыг заавал нягтлаарай.
