2025 оны нэгдүгээр сарын 9-ний өдөр Улаан дүрс нэртэй хуудсаас “Баруун 4 замаас Зүүн 4 замын хооронд 1 удаа зорчиход 27000₮ төлнө” гэсэн тайлбартай бичлэгийг нийтэлжээ. Уг бичлэг 4300 реакц, 4900 сэтгэгдэл авч, 5000 гаруй удаа цааш түгээгдсэн байна.
FACTCHECK: Бид дараах байдлаар баримт шалгалт хийлээ
Тухайн бичлэгт Нийслэлийн засаг дарга Х.Нямбаатар төлбөртэй бүсийн зохицуулалтын тухай ярьж байгаа бөгөөд уг дүрсэнд Zuv.mn-ий лого байгаа юм. Иймд анхдагч эх сурвалж болох Zuv.mn-ий хуудсаас дээрх агуулгын дагуу хайлт хийхэд 2023 оны 10 дугаар сарын 29-ний бичлэг илэрлээ. Нийслэлийн засаг дарга Х.Нямбаатар тухайн зохицуулалтыг хэрэгжүүлэх төлөвлөгөөний талаар мэдээлсэн ч энэ хүрээнд баталсан “Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай” хуульд дээрх заалтыг тусгаагүй байна. Энэ нь төлбөртэй бүсийг бий болгохоор хэлэлцэж, олон нийтэд мэдээлж байсан ч хэрэгжүүлэхээргүй болсон гэсэн үг юм.
- Харин шалгаж буй бичлэгт хоёр жилийн өмнөх мэдэгдлийг өнөө цагт болж буй мэтээр түгээж, тодорхой тайлбаргүй бичсэн нь олон нийтийн дунд төөрөгдлийг бий болгож байна.
Мөн шалгаж буй бичлэгийн тайлбарт бичсэн 27,000 төгрөгийн үнийн дүнгийн талаар бидний хийсэн баримт шалгалтыг “энд“-ээс уншаарай. Хотын дарга Х.Нямбаатар төлбөртэй бүсийн төлөвлөлтийн талаар танилцуулах үедээ “Нийслэлийн иргэдийн төлөөлөгчдийн хурал төлбөртэй бүс тогтоох эрхтэй болсны дараа 0 төгрөгөөс 27,000 хүртэлх төгрөгийн тарифыг тогтооно. 2000₮, 5000₮, 10,000₮ байж болно” гэж хэлж байсан байна.
Үүнээс гадна 20 минутын бүтэн бичлэгээс тодорхой хэсгийг тасалж түгээснээр мэдээллийн үндсэн агуулга алдагдаж, төөрөгдүүлэхээр байна. Энэ мэтчилэн аливаа бичлэгийг тасалж түгээх нь мэдээлэл хэт нэг талыг барьж, мушгин гуйвуулсан мэтээр олон нийтэд хүрдэг.
~~~
Олон нийтийн сүлжээгээр хуучин мэдээллийг шинэ мэтээр түгээх нь нийгэмд төөрөгдөл, үл ойлголцлыг үүсгэх эрсдэлтэй. Ийм төрлийн мэдээлэл нь цаг хугацаа, нөхцөл байдал, учир шалтгаан зэргийг тодорхой дурдаагүйгээс үүдсэн байдаг. Энэ нь зарим чухал мэдээллийг санамсаргүй орхигдуулсан тохиолдолд үүсэх магадлалтай ч ихэнх тохиолдолд хүмүүсийн санаа бодолд нөлөөлөх зорилгоор санаатайгаар төөрөгдүүлсэн мэдээлэл түгээх нь бий.
Иймд ямар нэгэн мэдээллийг нийтэлж, хуваалцахаасаа өмнө эх сурвалжийг сайтар шалгаж, тухайн мэдээлэл хуучирсан эсэхийг баталгаажуулж байгаарай.
